కేఎల్, రతన్ టాటా ఇన్నోవేషన్ హబ్ సంయుక్త సమావేశం

తాడేపల్లి   న్యూస్    కేఎల్‌ యూనివర్సిటీలో రతన్‌ టాటా ఇన్నోవేషన్‌ హబ్‌ (ఆర్టీ ఐ హెచ్ ) సంయుక్త ఆధ్వర్యంలో కార్పొరేట్‌–ఇన్‌స్టిట్యూషన్‌ అనుసంధాన సమావేశం సోమవారం  ఘనంగా జరిగింది. వడ్డేశ్వరం లోని యూనివర్సిటీ ప్రాంగణంలో పరిశ్రమలు, విద్యాసంస్థల మధ్య పరస్పర సహకారాన్ని బలోపేతం చేయడం, నూతన సాంకేతిక ఆవిష్కరణలు, సంయుక్త పరిశోధనలు మరియు స్టార్టప్‌లను ప్రోత్సహించడమే లక్ష్యంగా ఈ ప్రత్యేక కార్యక్రమాన్ని నిర్వహించారు. ఈసందర్భంగా వివిధ రంగాలకు చెందిన కార్పొరేట్ ప్రతినిధులు, స్టార్టప్ నిర్వాహకుల బృందం విశ్వవిద్యాలయాన్ని సందర్శించి.. విద్యార్థులకు పరిశ్రమల ఆధారిత ప్రాజెక్టులు అందించడం, సాంకేతిక పరిజ్ఞాన మార్పిడి మరియు నూతన ఉత్పత్తుల అభివృద్ధి వంటి పలు కీలక అంశాలపై విస్తృతంగా చర్చించారు.ఈ కార్యక్రమంలో కేఎల్‌ వర్సిటీ ఉపకులపతి డాక్టర్‌ జి. పార్థసారథి వర్మ, ప్రో వైస్ చాన్సులర్లు డాక్టర్ ఎన్. వెంకట్ రామ్, డాక్టర్ కె. రాజశేఖర రావు, రిజిస్ట్రార్ డాక్టర్ కె. పవన్ కుమార్ మరియు ఆవిష్కరణల కేంద్రం సీనియర్‌ డైరెక్టర్‌ డాక్టర్‌ వి. రాజేష్‌లతో పాటు డీప్‌ల్యూర్‌ సీఈఓ హర్షవర్ధన్‌, స్పేస్‌ఇన్ఫ్‌ టెక్నాలజీస్‌ వ్యవస్థాపకురాలు డాక్టర్‌ శ్రీదేవి తాళ్లూరి, ఇతర ప్రముఖ కంపెనీల ప్రతినిధులు పాల్గొన్నారు.