కె ఎల్ యు యూనివర్సిటీ లైబ్రరీలో ఘోర అగ్నిప్రమాదం: తగలబడిన పుస్తకాలు, ఫర్నిచర్

విజయవాడ, సూర్య ప్రతినిధి :నగర సమీపంలోని ప్రముఖ కేఎల్‌యూ (KLU) యూనివర్సిటీ లైబ్రరీ భవనంలో శుక్రవారం అకస్మాత్తుగా పేలుడు సంభవించి భారీ అగ్నిప్రమాదం చోటుచేసుకుంది. పేలుడు ధాటికి గ్రంథాలయంలో ఒక్కసారిగా మంటలు చెలరేగడంతో తీవ్ర కలకలం రేగింది. ప్రమాద సమయంలో అక్కడ ఉన్న విద్యార్థులు, సిబ్బంది తీవ్ర భయాందోళనలకు గురై ప్రాణాలు దక్కించుకోవడానికి బయటకు పరుగులు తీశారు.

ఈ ప్రమాదంలో లైబ్రరీలోని భారీ మొత్తంలో పుస్తకాలు, కంప్యూటర్లు మరియు ఫర్నిచర్ దగ్ధమయ్యాయి. సమాచారం అందుకున్న ఫైర్ సిబ్బంది వెంటనే ఘటనా స్థలానికి చేరుకుని మంటలను అదుపులోకి తెచ్చేందుకు శ్రమించారు. ఘటనా సమయంలో అప్రమత్తమై విద్యార్థులందరూ సురక్షితంగా బయటకు రావడంతో ఎవరికీ ఎటువంటి ప్రాణాపాయం జరగలేదని విశ్వవిద్యాలయ యాజమాన్యం ప్రకటించింది. కాగా, షార్ట్ సర్క్యూట్ కారణంగానే పేలుడు జరిగి మంటలు వ్యాపించి ఉంటాయని ప్రాథమికంగా అనుమానిస్తున్నారు.