భారత్ ఖాతాలో 18వ పసిడి, 78 పతకాలతో 5వ స్థానంలో టీమిండియా
ఐచి (జపాన్): ఏషియన్ గేమ్స్ 2026లో భారత అథ్లెట్లు సంచలన ప్రదర్శనను కొనసాగిస్తున్నారు. గోల్ఫ్‌లో భారత మహిళా గోల్ఫర్ ప్రణవి శరత్ ఉర్స్ సరికొత్త చరిత్ర సృష్టించింది. శనివారం జరిగిన మహిళల వ్యక్తిగత గోల్ఫ్ ఈవెంట్‌లో అద్భుత ప్రదర్శన కనబరిచిన ప్రణవి స్వర్ణ పతకాన్ని కైవసం చేసుకుంది. ఏషియన్ గేమ్స్ చరిత్రలోనే గోల్ఫ్‌లో భారత్‌కు స్వర్ణం అందించిన తొలి మహిళా గోల్ఫర్‌గా ఆమె రికార్డు పుటలకెక్కింది.
ఆఖరి రౌండ్ వరకు ఉత్కంఠభరితంగా సాగిన ఈ పోటీలో ప్రణవి సరైన సమయంలో బర్డీలతో పుంజుకుని అగ్రస్థానాన్ని నిలబెట్టుకుంది. ప్రణవి మెరుపులతో భారత్‌కు వ్యక్తిగత పతకంతో పాటు టీమ్ ఈవెంట్‌లోనూ వెండి పతకం లభించింది.
ఈ స్వర్ణంతో ప్రస్తుత ఏషియన్ గేమ్స్‌లో భారత్ సాధించిన పసిడి పతకాల సంఖ్య 18కి చేరింది. మొత్తంగా భారత్ ఖాతాలో ఇప్పటివరకు 78 పతకాలు చేరగా, పతకాల పట్టికలో భారత్ 5వ స్థానంలో కొనసాగుతోంది. గోల్ఫ్‌లో లభించిన ఈ చారిత్రక విజయంతో దేశవ్యాప్తంగా క్రీడాభిమానులు సంతోషం వ్యక్తం చేస్తున్నారు.
