సరిహద్దుల్లో అవినీతి, వీసా అక్రమాలపై దక్షిణాఫ్రికా ఉక్కుపాదం: సంయుక్త దర్యాప్తు సంస్థల రంగప్రవేశం!

సూర్య ఇంటర్నేషనల్ డెస్క్: దక్షిణాఫ్రికా సరిహద్దులు, విమానాశ్రయాలు, పోర్టులు మరియు ఇమ్మిగ్రేషన్ విభాగంలో పేరుకుపోయిన లంచగొండితనం, నకిలీ పత్రాల దందాను తుదముట్టించేందుకు ఆ దేశ ప్రభుత్వం విస్తృత స్థాయి ఆపరేషన్‌ను ప్రారంభించింది. సరిహద్దు నిర్వహణ సంస్థ ‘బోర్డర్ మేనేజ్‌మెంట్ అథారిటీ’,అవినీతి నిరోధక ప్రత్యేక దర్యాప్తు విభాగం ‘స్పెషల్ ఇన్వెస్టిగేటింగ్ యూనిట్’,ఇమ్మిగ్రేషన్ శాఖ మరియు జాతీయ ప్రాసిక్యూషన్ విభాగం సంయుక్తంగా జొహన్నెస్‌బర్గ్‌లోని ఓఆర్ టాంబో అంతర్జాతీయ విమానాశ్రయం కేంద్రంగా ప్రత్యేక అవినీతి వ్యతిరేక ప్రచారాన్ని, కఠిన తనిఖీలను ముమ్మరం చేశాయి.
దేశ సరిహద్దు భద్రతను పటిష్టం చేయడంతో పాటు వలస చట్టాల ఉల్లంఘనలను ఎట్టిపరిస్థితుల్లోనూ సహించేది లేదని అధ్యక్షుడు సిరిల్ రామఫోసా ప్రకటించిన నేపథ్యంలో దర్యాప్తు సంస్థలు కార్యాచరణను వేగవంతం చేశాయి.
సరిహద్దుల్లో అక్రమాలు – దర్యాప్తు సంస్థల పరిశీలన 
పోర్టులు, చెక్‌పోస్టుల్లో దందాలు:కస్టమ్స్ అధికారులు, బోర్డర్ గార్డులు, ఇమ్మిగ్రేషన్ సిబ్బంది తమ విచక్షణాధికారాలను దుర్వినియోగం చేస్తూ పన్నులు ఎగవేసే ప్రయాణికులతో కుమ్మక్కవడం, అక్రమ సరుకుల రవాణాకు సహకరించడం, సాధారణ సేవలకే లంచాలు డిమాండ్ చేయడం వంటి చర్యలపై అధికారులు దృష్టి సారించారు.మార్కెట్‌గా మారిన ఇమ్మిగ్రేషన్:దక్షిణాఫ్రికా ఇమ్మిగ్రేషన్ వ్యవస్థ కొన్ని ముఠాలు, అధికారుల వల్ల ఒక ‘సంత’లా మారిపోయిందని, ఎక్కువ మొత్తంలో డబ్బు చెల్లించిన వారికి వీసాలు, పర్మిట్లు విక్రయిస్తున్నారని దర్యాప్తులో తేలింది.
2,000 నకిలీ స్టడీ వీసాల రద్దు: అక్రమ నెట్‌వర్క్‌ల ద్వారా జారీ చేసిన 2,000కు పైగా బోగస్ స్టడీ వీసాలను హోం వ్యవహారాల శాఖ గుర్తించి, వాటిని రద్దు చేసే ప్రక్రియను ఇప్పటికే ప్రారంభించింది.
కఠిన చర్యలు & సాంకేతిక నిఘా :ఉద్యోగులపై వేటు, క్రిమినల్ కేసులు: అవినీతికి పాల్పడిన పలువురు బోర్డర్ సెక్యూరిటీ సిబ్బందిని, ఇమ్మిగ్రేషన్ అధికారులను సర్వీసుల నుంచి తొలగించడంతో పాటు వారిపై క్రిమినల్ కేసులు నమోదు చేసి జైలుకు పంపుతున్నారు.
బాడీ కెమెరాల వినియోగం:పోర్టులు, ఎంట్రీ పాయింట్లలో పారదర్శకతను పెంచేందుకు క్షేత్రస్థాయి అధికారులకు 'బాడీ వార్న్ కెమెరాలు'  తప్పనిసరి చేశారు.
ప్రజా ఫిర్యాదుల వేదికలు: సరిహద్దుల్లో లంచాలు డిమాండ్ చేసినా లేదా నకిలీ డాక్యుమెంట్ల తయారీపై అనుమానాలు వచ్చినా పౌరులు నేరుగా సమాచారం ఇచ్చేలా ప్రత్యేక టోల్‌ఫ్రీ హాట్‌లైన్లు, ఆన్‌లైన్ పోర్టళ్లను అందుబాటులోకి తెచ్చారు.సరిహద్దు సార్వభౌమత్వాన్ని కాపాడుతూ, దేశంలోకి చట్టవిరుద్ధ వలసలు మరియు నేరస్థుల ప్రవేశాన్ని అడ్డుకోవడానికి ఈ ప్రక్షాళన చర్యలు నిరంతరం కొనసాగుతాయని ప్రభుత్వం స్పష్టం చేసింది.