బస్సులు సమయానికి నడపాలంటూ విద్యార్థుల ధర్నా

వికారాబాద్‌ బస్‌స్టేషన్‌, డిపో ఎదుట రెండు గంటల పాటు ఆందోళన
వికారాబాద్‌, మేజర్ న్యూస్ (అక్టోబర్ 03):: బస్సులు సమయానికి నడపడం లేదంటూ విద్యార్థులు వికారాబాద్‌ బస్‌స్టేషన్‌, ఆర్టీసీ డిపో ఎదుట ధర్నాకు దిగారు. శనివారం విద్యార్థులు పెద్ద సంఖ్యలో ఆందోళనలో పాల్గొని ఆర్టీసీ అధికారుల తీరుపై అసంతృప్తి వ్యక్తం చేశారు.గ్రామీణ ప్రాంతాల నుంచి వికారాబాద్‌కు విద్య కోసం వచ్చే విద్యార్థులకు బస్సుల కొరత, సమయపాలన లేకపోవడంతో తీవ్ర ఇబ్బందులు ఎదురవుతున్నాయని వారు తెలిపారు. నిర్ణీత సమయానికి బస్సులు రాకపోవడంతో పాఠశాలలు, కళాశాలలకు ఆలస్యంగా చేరుకోవాల్సి వస్తోందని ఆవేదన వ్యక్తం చేశారు. ముఖ్యంగా ఉదయం వేళల్లో విద్యార్థుల రద్దీకి అనుగుణంగా బస్సులు అందుబాటులో ఉండటం లేదని పేర్కొన్నారు.ఈ నేపథ్యంలో విద్యార్థులు బస్‌స్టేషన్‌ వద్ద నుంచి డిపో వరకు ఆందోళన చేపట్టి, బస్సులను క్రమబద్ధంగా నడపాలని డిమాండ్‌ చేశారు. సుమారు రెండు గంటల పాటు కొనసాగిన ధర్నాతో బస్‌స్టేషన్‌ పరిసరాల్లో కొంతసేపు ఉద్రిక్త పరిస్థితి నెలకొంది.విద్యార్థుల సమస్యలను అధికారులు వెంటనే పరిష్కరించి, విద్యార్థుల రద్దీకి అనుగుణంగా అదనపు బస్సులు ఏర్పాటు చేయడంతో పాటు సమయపాలన పాటించాలని వారు కోరారు.