కావలిలో ముందస్తు చర్యలు వేగవంతం – తీరప్రాంతాలు, పునరావాస కేంద్రాలను పరిశీలించిన ఆర్డీఓ, తహసీల్దార్.

​కావలి, మేజర్ న్యూస్ :   బంగాళాఖాతంలో ఏర్పడిన తీవ్ర వాయుగుండం 'మరుసు' తుఫానుగా రూపంతరం చెందింది. ఈ తుఫాను సోమవారం రాత్రి తీరం దాటే అవకాశం ఉందన్న వాతావరణ శాఖ హెచ్చరికల నేపథ్యంలో, ఉన్నతాధికారుల ఆదేశాల మేరకు కావలి రెవెన్యూ యంత్రాంగం అప్రమత్తమై ముందస్తు రక్షణ చర్యలను వేగవంతం చేసింది.  ​ఈ ముందస్తు చర్యల్లో భాగంగా కావలి ఆర్డీఓ  ఎలీషా బాబు, మండల రెవెన్యూ అధికారి తహసీల్దార్ శ్రావణ్ కుమార్ రెవెన్యూ సిబ్బందితో కలిసి తీరప్రాంతాల్లో విస్తృతంగా పర్యటించారు.
​తీర ప్రాంతాల పరిశీలన – మత్స్యకారులకు సూచనలు : కావలి మండల పరిధిలోని సముద్ర తీర ప్రాంతాలైన వెంకటేశ్వరపురం, జువ్వలదిన్నె, షిప్పింగ్ హార్బర్ మరియు వివిధ రిలీఫ్ సెంటర్లను ఆర్డీఓ, ఎమ్మార్వో ప్రత్యేకంగా పరిశీలించారు. అర్బన్ ప్రాంతాల్లో నివాసముంటున్న మత్స్యకారులను కలిసి తుఫాన్ తీవ్రతను వివరించారు. ఎవరూ సముద్ర వేటకు వెళ్లవద్దని, సురక్షిత ప్రాంతాల్లో ఉండాలని తగు సూచనలు, సలహాలు అందించారు. అత్యవసర పరిస్థితి ఏర్పడితే అధికారులకు సమాచారం అందించాలని కోరారు.
​గిరిజన కుటుంబాల తరలింపు : కావలి పట్టణ పరిధిలోని వైకుంఠపురంలో నివసిస్తున్న గిరిజన సామాజిక వర్గానికి చెందిన సుమారు 50 మందిని సురక్షిత ప్రాంతాలకు తరలించేందుకు ప్రత్యేక చర్యలు చేపట్టారు. లోతట్టు, తాత్కాలిక నివాసాల్లో ఉన్న వీరిని పునరావాస కేంద్రాలకు వేగంగా తరలించి, వారికి కావలసిన ప్రాథమిక సౌకర్యాలు కల్పించేలా ఆర్డీఓ ఎలీషా బాబు, తహసీల్దార్ శ్రావణ్ కుమార్ దగ్గరుండి సహాయక చర్యలను పర్యవేక్షించారు. ​ఈ కార్యక్రమంలో రెవెన్యూ యంత్రాంగం, విఆర్ఓలు, ఆర్ఐలు మరియు ఇతర సచివాలయ సిబ్బంది పాల్గొన్నారు. తుఫాను ప్రమాదం పూర్తిగా తొలగిపోయే వరకు ప్రజలందరూ అప్రమత్తంగా ఉండాలని అధికారులు సూచించారు.