కావలి డిపోలో ఘనంగా ముగిసిన బ్రిక్స్ సుస్థిర జీవనశైలి వారోత్సవాలు – డీఎం. డి. ఆదినారాయణ
కావలి, మేజర్ న్యూస్ : ఆంధ్రప్రదేశ్ రాష్ట్ర రోడ్డు రవాణా సంస్థ, కావలి డిపోలో నిర్వహిస్తున్న బ్రిక్స్ సుస్థిర జీవనశైలి వారోత్సవాలు -2026 ముగింపు ఏడవ రోజు కార్యక్రమంలో భాగంగా శనివారం డిపో గ్యారేజ్ ప్రాంగణంలో వ్యర్థాల తగ్గింపు – వ్యర్థాల నిర్వహణ అంశంపై అవగాహన కార్యక్రమం నిర్వహించారు. ఈ సందర్భంగా డిపో మేనేజర్ డి. ఆదినారాయణ మాట్లాడుతూ, నిత్య జీవితంలో ఉత్పత్తి అయ్యే వ్యర్థాలను శాస్త్రీయ పద్ధతుల్లో సేకరించడం, తడి – పొడి వ్యర్థాలుగా వేరు చేయడం, సరైన విధంగా పారవేయడం, పునర్వినియోగం చేయడం వంటి చర్యలే సమర్థవంతమైన వ్యర్థాల నిర్వహణకు కీలకమని వివరించారు.
వ్యర్థాలను ప్రధానంగా మూడు రకాలుగా విభజించి నిర్వహించాలని సూచించారు. తడి వ్యర్థాల కింద వ్యర్థమైన గ్రీజు, ఆయిల్స్ తదితరాలను, పొడి వ్యర్థాల కింద కాగితాలు, అట్టపెట్టెలు, ప్లాస్టిక్, గాజు, లోహపు వస్తువులను గుర్తించి, వాటిని సంబంధిత రీసైక్లింగ్ కేంద్రాలకు పంపించాలని తెలిపారు. అదేవిధంగా బ్యాటరీలు, కాలిపోయిన ఎల్‌ఈడీ బల్బులు, ట్యూబ్‌లైట్లు, చోక్స్, ఎలక్ట్రానిక్ వ్యర్థాలు, రసాయన పదార్థాలు వంటి ప్రమాదకర వ్యర్థాలను సాధారణ చెత్తతో కలపకుండా ప్రత్యేక జాగ్రత్తలతో, నిపుణుల పర్యవేక్షణలో నిర్వహించాలని సూచించారు. వ్యర్థాల నిర్వహణలో తగ్గించడం (రెడ్యూస్ ), తిరిగి వినియోగించడం (రీయూజ్ ), పునర్వినియోగ ప్రక్రియ (రీసైకిల్ ), సేంద్రీయ ఎరువుల తయారీ (కంపోస్టింగ్ ) అనే నాలుగు సూత్రాలను ప్రతి ఒక్కరూ తమ దైనందిన జీవితంలో పాటించాలని పిలుపునిచ్చారు. ప్రభుత్వ మార్గదర్శకాల ప్రకారం వ్యర్థాలను ఉత్పత్తి అయిన చోటనే వేరు చేయడం ప్రతి ఒక్కరి బాధ్యత అని స్పష్టం చేశారు. అనంతరం వారం రోజులపాటు నిర్వహించిన బ్రిక్స్ సుస్థిర జీవనశైలి వారోత్సవాలను విజయవంతం చేసిన డిపో సిబ్బంది అందరికీ డిపో మేనేజర్ కృతజ్ఞతలు తెలియజేశారు. కార్యక్రమం ముగింపులో సిబ్బంది పర్యావరణ హితమైన జీవనశైలిని అవలంబిస్తూ, వ్యర్థాల తగ్గింపు మరియు సమర్థవంతమైన నిర్వహణకు కట్టుబడి ఉంటామని ప్రతిజ్ఞ చేశారు. దీంతో కావలి డిపోలో వారం రోజులపాటు ఉత్సాహంగా నిర్వహించిన బ్రిక్స్ సుస్థిర జీవనశైలి వారోత్సవాలు - 2026 ఘనంగా ముగిశాయి. ఈ కార్యక్రమం లో అసిస్టెంట్ ఇంజనీర్ ( మెకానికల్ ) యస్కె ఖాజా మొహిద్దీన్, మెకానికల్ సూపెర్వైజర్ నజీర్ ఖాన్, బస్టేషన్ సూపెర్వైజర్ డి రవిప్రకాష్, సిబ్బంది పాల్గొన్నారు.
