జగదాంబ క్లాక్ టవర్‌కు కాలం చెల్లిందా?
విశాఖపట్నం, సూర్య : నగరంలో అత్యంత రద్దీగా ఉండే జగదాంబ జంక్షన్‌కు ప్రత్యేక ఆకర్షణగా నిలవాల్సిన క్లాక్ టవర్ ప్రస్తుతం నిర్లక్ష్యానికి నిలువెత్తు నిదర్శనంగా మారింది. సుమారు రూ.2 కోట్లకు పైగా ప్రజాధనం వెచ్చించి నిర్మించిన ఈ క్లాక్ టవర్‌లో గడియారం గత మూడు, నాలుగు నెలలుగా పనిచేయడం లేదు. గంటలు మోగడం ఎప్పుడో ఆగిపోగా, ఇప్పుడు సమయం చూపించే గడియారాలు సైతం నిలిచిపోవడం జీవీఎంసీ నిర్వహణ తీరుపై తీవ్ర విమర్శలకు తావిస్తోంది.
జగదాంబ జంక్షన్‌కు వచ్చే ప్రజలు, వ్యాపారులు ఒకప్పుడు తమ చేతి గడియారాలు, మొబైల్ ఫోన్ల సమయాన్ని క్లాక్ టవర్‌తో సరిచూసుకునేవారు. ఉదయం దుకాణాలు తెరిచే సమయం నుంచి రాత్రి మూసే వరకు వ్యాపారులకు ఈ గడియారమే సమయ సూచికగా ఉండేది. అలాంటి క్లాక్ టవర్ ఇప్పుడు కాలం ఆగిపోయిన చిహ్నంగా మిగిలిపోయింది.
నాలుగు వైపులా భారీ గడియారాలు, జీపీఎస్ ఆధారిత సాంకేతిక వ్యవస్థ, ప్రతి గంటకు గంట మోగే ప్రత్యేక ఏర్పాటు అంటూ నిర్మాణ సమయంలో అధికారులు గొప్పగా ప్రచారం చేశారు. కానీ ఆర్భాటంగా ప్రారంభించిన ఈ గడియారం నిర్వహణ విషయంలో మాత్రం పూర్తిగా నిర్లక్ష్యం ప్రదర్శించారనే ఆరోపణలు వెల్లువెత్తుతున్నాయి. ప్రారంభమైన కొద్ది రోజులకే గంటల శబ్దం నిలిచిపోగా, ప్రస్తుతం సమయం కూడా చూపించలేని దుస్థితి నెలకొంది. క్లాక్ టవర్ నిర్వహణ బాధ్యతల విషయంలోనూ స్పష్టత లేకపోవడం, పర్యవేక్షణ కొరవడటం పరిస్థితిని మరింత దిగజార్చిందని స్థానిక వ్యాపారులు విమర్శిస్తున్నారు.
