ఇందుకూరుపేటలో ఖాళీ అవుతున్న వైసీపీ.. టీడీపీలోకి 300 మందికి పైగా చేరిక

నెల్లూరు,  మేజర్ న్యూస్ :   ఇందుకూరుపేట మండలంలో వైసీపీకి గట్టి ఎదురుదెబ్బ తగిలింది. మండలంలోని కొత్తూరుకు చెందిన ఎంపీటీసీ సభ్యులు, స్వతంత్ర అభ్యర్థి, వైసీపీ ముఖ్య నాయకులు తమ అనుచరులతో కలిసి ఆదివారం తెలుగుదేశం పార్టీలో చేరారు. నెల్లూరులోని వీపీఆర్ కార్యాలయంలో జరిగిన కార్యక్రమంలో కోవూరు శాసనసభ్యులు శ్రీమతి వేమిరెడ్డి ప్రశాంతి రెడ్డి గారు వారికి పసుపు కండువాలు కప్పి సాదరంగా పార్టీలోకి ఆహ్వానించారు. ఈ సందర్భంగా ఎమ్మెల్యే ప్రశాంతి రెడ్డి గారు మాట్లాడుతూ.. కోవూరు నియోజకవర్గంలో తెలుగుదేశం పార్టీకి తిరుగులేదని ధీమా వ్యక్తం చేశారు. కూటమి ప్రభుత్వం చేపడుతున్న అభివృద్ధి, సంక్షేమ కార్యక్రమాలకు ఆకర్షితులై ప్రతిపక్ష పార్టీల నాయకులు సైతం తెలుగుదేశంలోకి రావడం మంచి పరిణామమన్నారు. ఇందుకూరుపేట మండలంలో వైసీపీ ఖాళీ అయిందని పేర్కొన్నారు.

పార్టీ బలోపేతానికి సమష్టి కృషి
కొత్తగా చేరిన నాయకులు పార్టీలో ఇప్పటికే ఉన్న నాయకులు, కార్యకర్తలతో సమన్వయంతో కలిసి పనిచేయాలని ఎమ్మెల్యే గారు సూచించారు. కూటమి ప్రభుత్వ పథకాలను ప్రతి గ్రామంలోనూ ప్రజలకు విస్తృతంగా వివరించాలన్నారు. రానున్న పంచాయతీ ఎన్నికల్లో కూటమి అభ్యర్థుల విజయానికి అందరూ సమష్టిగా కృషి చేయాలని, తెలుగుదేశం పార్టీ కోసం బాధ్యతతో పనిచేయాలని పిలుపునిచ్చారు. గ్రామాల్లో ప్రజలు ఎదుర్కొంటున్న సమస్యలను తన దృష్టికి తీసుకువస్తే పరిష్కారానికి అవసరమైన చర్యలు తీసుకుంటానని ఎమ్మెల్యే గారు హామీ ఇచ్చారు. తాను ప్రజలకు నిరంతరం అందుబాటులో ఉంటున్నానని, తన వెంట నడిచే ప్రజాప్రతినిధులు, నాయకులు కూడా ప్రజలకు అందుబాటులో ఉండేవారేనని స్పష్టం చేశారు.

టీడీపీలో చేరిన కీలక నాయకులు
ఎంఎస్‌ఎంఈ రాష్ట్ర డైరెక్టర్ వీరేంద్ర నాయుడు, టీడీపీ ముఖ్య నాయకులు కళ్యాణ్ రెడ్డి, ఇందుకూరుపేట మండలాధ్యక్షులు పవన్ కుమార్ రెడ్డి, వేగూరు శివకుమార్ రెడ్డి ఆధ్వర్యంలో ఈ చేరికల కార్యక్రమం జరిగింది. ఇందుకూరుపేట 2/1 స్వతంత్ర సభ్యులు ఆల్తూరు వెంకట లక్ష్మి, 2/2 ఎంపీటీసీ సభ్యులు భీమవరపు వెంకట కృష్ణారెడ్డి, వైసీపీ నాయకులు గండవరపు రామిరెడ్డి, మద్దాల రమేష్ రెడ్డి, ఈగ విజయమ్మ, మాణిక్యాల నిర్మలమ్మ తమ అనుచరులతో కలిసి పార్టీలో చేరారు. 300 మందికి పైగా అనుచరులు టీడీపీ తీర్థం పుచ్చుకున్నారు. ఈ సందర్భంగా వారు మాట్లాడుతూ.. ఎమ్మెల్యే గారి నాయకత్వంలో పార్టీ బలోపేతానికి కృషి చేస్తామని తెలిపారు. ఇప్పటికే ఎమ్మెల్యే గారి సహకారంతో గ్రామాల్లో లక్షలాది రూపాయల నిధులతో పలు అభివృద్ధి పనులు జరిగాయని ఆనందం వ్యక్తం చేశారు. రానున్న రోజుల్లో మరిన్ని అభివృద్ధి కార్యక్రమాలు చేపట్టేందుకు ఎమ్మెల్యే గారితో కలిసి పనిచేస్తామని, పార్టీ అభివృద్ధికి తమ వంతు సహకారం అందిస్తామని వెల్లడించారు.