ఇంద్రకీలాద్రిపై భక్తుల రద్దీ

ఇంద్రకీలాద్రి, మేజర్ న్యూస్: దసరా శరన్నవరాత్రి ఉత్సవాల చివరి రోజైన మంగళవారం ఇంద్రకీలాద్రిపై భక్తుల రద్దీ భారీగా పెరిగింది. సాధారణ భక్తులతో పాటు భవానీమాలధారులు పెద్ద సంఖ్యలో తరలిరావడంతో కొండపై సందడి నెలకొంది. శ్రీ కనకదుర్గమ్మ దర్శనం కోసం భక్తులు బారులు తీరారు. భక్తులకు సౌకర్యవంతమైన దర్శనం కల్పించేందుకు ప్రభుత్వం, దేవస్థానం, జిల్లా యంత్రాంగం సమన్వయంతో తాగునీరు, క్యూలైన్ల నిర్వహణ, పారిశుద్ధ్యం, భద్రతకు అవసరమైన ఏర్పాట్లు చేపట్టాయి. దేవాదాయ శాఖ కమిషనర్ కె. రామచంద్ర మోహన్, ఎన్‌టీఆర్ జిల్లా కలెక్టర్ డాక్టర్ జి. లక్ష్మీశ, పోలీస్ కమిషనర్ ఎస్.వి. రాజశేఖరబాబు, దేవస్థానం ఈవో వి.కె. శీనా నాయక్, విజయవాడ నగరపాలక సంస్థ కమిషనర్ హెచ్.ఎం. ధ్యానచంద్ర తదితరులు ఏర్పాట్లను పర్యవేక్షించారు. రద్దీ అధికంగా ఉన్నప్పటికీ సంబంధిత శాఖలు సమన్వయంతో పనిచేయడంతో భక్తులకు సౌకర్యవంతమైన దర్శనం లభించిందని పలువురు సంతృప్తి వ్యక్తం చేశారు. నవరాత్రి ఉత్సవాల ముగింపు వేళ భవానీల రాకతో ఇంద్రకీలాద్రి ఆధ్యాత్మిక శోభను సంతరించుకుంది.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.