చెడుపై మంచి విజయం.. భక్తిశ్రద్ధలతో వత్సవాయి పోలీస్‌స్టేషన్‌లో దసరా వేడుకలు!
వత్సవాయి పోలీస్‌స్టేషన్‌లో దేవీ నవరాత్రి వేడుకలు ఘనంగా నిర్వహించారు. అమ్మవారి ప్రత్యేక పూజలు, సంప్రదాయ కోలాటాలు, డప్పు కళాకారుల ప్రదర్శనలతో పోలీస్‌స్టేషన్‌ ప్రాంగణం పండుగ వాతావరణాన్ని సంతరించుకుంది. వత్సవాయి ఎస్‌ఐ ఉమామహేశ్వరరావు తన కుటుంబ సభ్యులతో కలిసి ఈ వేడుకల్లో పాల్గొని అమ్మవారికి ప్రత్యేక పూజలు నిర్వహించారు.దసరా పర్వదినాన్ని పురస్కరించుకుని పోలీసు సిబ్బంది సంప్రదాయబద్ధంగా అతిథులకు స్వాగతం పలికారు. కోలాటాలు, డప్పు కళాకారుల ప్రదర్శనలు వేడుకలకు ప్రత్యేక ఆకర్షణగా నిలిచాయి. అనంతరం ఎస్‌ఐ ఉమామహేశ్వరరావు, ఆయన కుటుంబ సభ్యులు, పోలీసు సిబ్బంది అమ్మవారిని దర్శించుకుని ఆశీస్సులు పొందారు.ఈ సందర్భంగా ఎస్‌ఐ ఉమామహేశ్వరరావు మాట్లాడుతూ.. చెడుపై మంచి విజయం సాధించిన సందర్భంగా దసరా పండుగను జరుపుకుంటామని తెలిపారు. మండల ప్రజలందరూ సుఖసంతోషాలతో ఉండాలని, యువత చెడు ప్రవర్తనలకు దూరంగా ఉంటూ మంచి మార్గంలో నడవాలని అమ్మవారిని కోరుకున్నట్లు చెప్పారు. మండల ప్రజలందరికీ దసరా శుభాకాంక్షలు తెలియజేశారు.భక్తి భావం, సంప్రదాయ కళారూపాల సమ్మేళనంగా వత్సవాయి పోలీస్‌స్టేషన్‌లో దేవీ నవరాత్రి వేడుకలు వైభవంగా ముగిశాయి.
