గ్రంథాలయ ఉద్యమ నేతల సేవలు మరువలేనివి.
- ఉద్యమ నేతలకు ఘన నివాళి
తె ర్లాం, సూర్య: జాతీయ గ్రంథాలయ నిర్మాణం కోసం అశువులు బాసిన మహనీయుల త్యాగ ఫలాలు మరువలేనివని విశ్రాంతి మండల విద్యాశాఖ అధికారి ఎం సత్యనారాయణ కొనియాడారు. సోమవారం 59వ జాతీయ గ్రంథాలయ వారోత్సవాల సభకు ముఖ్య అతిథిగా విచ్చేశారు. ఈ సందర్భంగా ఆయన మాట్లాడుతూ గ్రంథాలయంలో సభ్యులుగా చేరండి విజ్ఞానం పొందండి అని పిలుపునిచ్చారు. పుస్తకాలు మీకు నిజమైన నేస్తాలని వాటిని చదివి జీవిత సత్యాలను గ్రహించాలని అన్నారు. పుస్తకమే పరమావధిగా భావించి పుస్తక పఠనం చేయాలని అందుకు సంబంధించి ప్రతిజ్ఞ కూడా చేయించారు. అలాగే గ్రంథాలయ అధికారి సిహెచ్ కృష్ణమూర్తి మాట్లాడుతూ ఉద్యమ పోరాట నాయకులు ఎస్ఆర్ రంగనాథన్ పాతూరు నాగభూషణ్ వెంకట రమణయ్య వారి సేవలను స్మరించి వారి ఆశ ఆశయ సాధనకు ప్రతి ఒక్కరూ కృషి చేయాలని ఈ సందర్భంగా కోరారు. తొలుత ఉద్యమ నాయకుల చిత్రపటాలకు పూలమాలవేసి ఘనంగా నివాళులర్పించారు. కార్యక్రమంలో వారితోపాటు క్రాఫ్ట్ టీచర్ విశ్వేశ్వరరావు స్థానిక సభ్యులు విశ్రాంతి రవి అంగన్వాడి కేంద్రం కార్యకర్త వై శ్రీదేవి పాఠకులు విద్యార్థులు పాల్గొన్నారు.