గ్రామాల వారీగా అభిప్రాయాల సేకరణ.. గెలుపు గుర్రాల ఎంపికపై గాదె మధుసూదన్ రెడ్డి దృష్టి!
మార్టూరు, మేజర్ న్యూస్:
స్థానిక సంస్థల ఎన్నికల నేపథ్యంలో మార్టూరు మండలంలో రాజకీయ సందడి నెలకొంది. ఎంపీటీసీ అభ్యర్థుల ఎంపికపై ప్రధాన దృష్టి సారించిన పర్చూరు నియోజకవర్గ ఇన్‌ఛార్జ్, రాష్ట్ర కార్యదర్శి గాదె మధుసూదన్ రెడ్డి ఆధ్వర్యంలో మండల స్థాయి విస్తృత సమావేశం నిర్వహించారు. మండల పరిధిలోని అన్ని గ్రామాలకు చెందిన నాయకులు, కార్యకర్తలతో సమావేశమై అభ్యర్థుల ఎంపికపై సమీక్షించారు.
ఈ సందర్భంగా గాదె మధుసూదన్ రెడ్డి మాట్లాడుతూ, పార్టీ కోసం నిబద్ధతతో పనిచేస్తూ, ప్రజల్లో మంచి ఆదరణ కలిగిన నాయకులకు అభ్యర్థుల ఎంపికలో ప్రాధాన్యత ఇస్తామని స్పష్టం చేశారు. గ్రామాల వారీగా స్థానిక నాయకులు, కార్యకర్తల అభిప్రాయాలను సేకరించి, పార్టీ విజయావకాశాలను దృష్టిలో ఉంచుకుని అభ్యర్థుల ఎంపిక ప్రక్రియను పూర్తి చేస్తామని తెలిపారు.
రానున్న స్థానిక సంస్థల ఎన్నికల్లో నాయకులు, కార్యకర్తలు సమన్వయంతో పనిచేయాలని, మండలవ్యాప్తంగా పార్టీ విజయానికి సమష్టిగా కృషి చేయాలని పిలుపునిచ్చారు. అభ్యర్థుల ఎంపికలో క్షేత్రస్థాయి పరిస్థితులు, ప్రజల ఆదరణ, పార్టీ కోసం పనిచేసిన వారి సేవలను పరిగణనలోకి తీసుకోవడంపై సమావేశంలో చర్చించినట్లు సమాచారం.
ఈ సమావేశంలో మార్టూరు మండలానికి చెందిన వివిధ హోదాల్లో ఉన్న పార్టీ నాయకులు, స్థానిక ప్రజాప్రతినిధులు, సీనియర్ నేతలు, కార్యకర్తలు పెద్ద సంఖ్యలో పాల్గొన్నారు.
స్థానిక ఎన్నికలు సమీపిస్తున్న వేళ ఎంపీటీసీ అభ్యర్థుల ఎంపికపై జరుగుతున్న ఈ కసరత్తు మార్టూరు మండల రాజకీయాల్లో ప్రాధాన్యత సంతరించుకుంది.
