గోల్డెన్ అవర్‌లో గోపిక ప్రాణాలు కాపాడిన రియల్ డాక్టర్లు అత్యవసర విభాగంలో వైద్యుల సమయస్ఫూర్తి.. కీలక చికిత్సతో ప్రాణాపాయం నుంచి రక్షణ
అనంతపురం బ్యూరో మేజర్ న్యూస్ : గోపిక ప్రాణాపాయ స్థితిలో ఆసుపత్రికి చేరుకోగా, అత్యవసర విభాగం (EMD) వైద్యులు గోల్డెన్ అవర్‌లో అందించిన తక్షణ వైద్య సేవలు ఆమె ప్రాణాలను కాపాడడంలో కీలకపాత్ర పోషించాయి. రక్తపోటు పూర్తిగా పడిపోయిన పరిస్థితిలో అసిస్టెంట్ ప్రొఫెసర్ డాక్టర్ నూరుల్లా ఖాన్, సీఏంఓ డాక్టర్ శ్యామ్ వెంటనే స్పందించి అత్యవసర చికిత్స ప్రారంభించారు.
ముందుగా సెంట్రల్ లైన్ ఏర్పాటు చేసి రక్తం ఎక్కించారు. కుడివైపు ఛాతీలో ఐసీడీ (ICD) ట్యూబ్ అమర్చడంతో పాటు ఈ-ఫాస్ట్ అల్ట్రాసౌండ్ స్కాన్ నిర్వహించారు. ముఖంపై ఉన్న గాయాలకు కుట్లు వేశారు. పరిస్థితికి అనుగుణంగా యాంటీబయాటిక్స్, నొప్పి నివారణ మందులు, ఇతర అత్యవసర ఔషధాలను అందించి రోగి పరిస్థితిని అదుపులోకి తీసుకువచ్చేందుకు కృషి చేశారు.
ఈ చికిత్సలో వైద్యులతో పాటు ఎంఎన్ఓ నందు కూడా సమన్వయంతో పనిచేస్తూ అవసరమైన సహాయాన్ని అందించారు. అత్యవసర విభాగంలోని స్టాఫ్ నర్సులు, టెక్నీషియన్లు సైతం వైద్యులకు సహకరిస్తూ చికిత్స ప్రక్రియలో కీలకంగా వ్యవహరించారు.
వైద్యపరంగా అత్యంత కీలకమైన గోల్డెన్ అవర్‌లో సమయస్ఫూర్తితో స్పందించి, సమన్వయంతో చికిత్స అందించిన అత్యవసర విభాగం వైద్యులు, సిబ్బంది సేవలు అభినందనీయం. వైద్య వృత్తిలో నిబద్ధత, అంకితభావానికి ఈ ఘటన నిదర్శనంగా నిలుస్తోంది.
రిపోర్టర్ : మొయినుద్దీన్, అనంతపురం బ్యూరో, మేజర్ న్యూస్.
