మహిళ పర్సు వెతికిపట్టిన సీసీసీ నస్పూర్ పోలీసులు

సూర్య, నస్పూర్‌ :  ఆటోలో మరిచిపోయిన మహిళ పర్సును సీసీ కెమెరాల ఫుటేజీ ఆధారంగా గుర్తించి సీసీసీ నస్పూర్ పోలీసులు బాధితురాలికి అప్పగించారు. పర్సులో ఉన్న 20 గ్రాముల బంగారు నక్లెస్, కీ ప్యాడ్ ఫోన్‌ను తిరిగి అందజేశారు. నస్పూర్ పట్టణం మల్లికార్జున నగర్‌కు చెందిన బలసంకుల మంగ (55) అక్టోబర్ 29న మంచిర్యాల గౌతమి నగర్‌లోని కోదండ రామాలయానికి వెళ్లి రాత్రి 8.30 గంటలకు ఆటోలో నస్పూర్ గేటు వద్ద దిగారు. ఈ సమయంలో పర్సును ఆటో వెనుక సీటులో మరిచిపోయారు. ఇంటికి వెళ్లిన తర్వాత విషయం గుర్తించి మరుసటి రోజు పోలీసులకు ఫిర్యాదు చేశారు. దీంతో సీసీసీ నస్పూర్ ఎస్సై తహసీనుద్దీన్ ఆధ్వర్యంలో ఎస్‌ఐ  టి జితేందర్ సింగ్,  సీసీటీవీ ఫుటేజీని పరిశీలించి బాధితురాలు ప్రయాణించిన ఆటోను గుర్తించారు. అందులోని పర్సును స్వాధీనం చేసుకున్నారు. ఆదివారం బాధితురాలికి పర్సుతో పాటు బంగారు నక్లెస్, మొబైల్ ఫోన్‌ను అందజేశారు. ఈ సందర్భంగా సిబ్బందిని  నస్పూర్ సీఐ గోపతి రవీందర్ అభినందించారు.