ఎన్‌హెచ్‌ఎం ఉద్యోగుల సమ్మెకు ఎంపీ డీకే అరుణ మద్దతు

నారాయణపేట, సూర్యన్యూస్: జాతీయ ఆరోగ్య మిషన్‌ కాంట్రాక్టు ఉద్యోగులు తమ న్యాయమైన డిమాండ్ల సాధన కోసం రాష్ట్రవ్యాప్తంగా చేపట్టిన నిరవధిక సమ్మె ఆదివారం నాటికి 20వ రోజుకు చేరుకుంది. ఈ నేపథ్యంలో నారాయణపేట జిల్లా కేంద్రంలో కొనసాగుతున్న సమ్మె శిబిరాన్ని మహబూబ్‌నగర్‌ ఎంపీ డీకే అరుణ సందర్శించి ఉద్యోగులకు సంఘీభావం తెలిపారు. జాతీయ ఆరోగ్య మిషన్‌ సంయుక్త కార్యాచరణ సమితి ఆధ్వర్యంలో కొనసాగుతున్న సమ్మెకు భారతీయ జనతా పార్టీ సంపూర్ణ మద్దతు ప్రకటిస్తుందని ఆమె తెలిపారు. ఈ సందర్భంగా ఎంపీ డీకే అరుణ మాట్లాడుతూ.. కాంగ్రెస్‌ పార్టీ తన ఎన్నికల ప్రణాళికలో జాతీయ ఆరోగ్య మిషన్‌ కాంట్రాక్టు ఉద్యోగులను క్రమబద్ధీకరిస్తామని హామీ ఇచ్చి అధికారంలోకి వచ్చినప్పటికీ, ఇప్పటివరకు ఆ హామీని అమలు చేయలేదని విమర్శించారు. ఇప్పటికైనా ముఖ్యమంత్రి సానుకూలంగా స్పందించి ఉద్యోగులను క్రమబద్ధీకరించాలని కోరారు. ఇప్పటికే ఏడు రాష్ట్రాల్లో జాతీయ ఆరోగ్య మిషన్‌ కాంట్రాక్టు ఉద్యోగులను క్రమబద్ధీకరించినట్లు పేర్కొంటూ, తెలంగాణలోనూ ఉద్యోగుల న్యాయమైన డిమాండ్లను రాష్ట్ర ప్రభుత్వం పరిష్కరించాలని డిమాండ్‌ చేశారు. ప్రజారోగ్య పరిరక్షణలో జాతీయ ఆరోగ్య మిషన్‌ ఉద్యోగులు కీలక పాత్ర పోషిస్తున్నారని ఆమె పేర్కొన్నారు. వారి కృషి వల్ల మాతృ మరణాల రేటు 25 శాతం నుంచి 19 శాతానికి, నవజాత శిశు మరణాల రేటు 15 శాతం నుంచి 5 శాతానికి తగ్గినట్లు తెలిపారు. అలాగే ఆసుపత్రుల్లో ప్రసవాల శాతం 70కి చేరడంలో ఉద్యోగుల సేవలు ఎంతో కీలకమని అన్నారు. క్షయ వ్యాధి రహిత భారతదేశం లక్ష్యంగా ప్రజల్లో అవగాహన కల్పిస్తూ, క్షయ వ్యాధి నివారణకు వారు నిరంతరం కృషి చేస్తున్నారని వివరించారు. ఇంతటి కీలకమైన సేవలు అందిస్తున్న ఉద్యోగులకు ప్రసూతి సెలవులు కల్పించకపోవడం, వేతనాలను సకాలంలో చెల్లించకపోవడం బాధాకరమని ఎంపీ పేర్కొన్నారు. ఉద్యోగుల సమస్యలను ప్రభుత్వం వెంటనే పరిష్కరించి, వారికి న్యాయం చేయాలని కోరారు. ఈ కార్యక్రమంలో భారతీయ జనతా పార్టీ రాష్ట్ర కార్యవర్గ సభ్యులు రతంగ్ పాండు రెడ్డి, పగడాకుల శ్రీనివాస్‌, జిల్లా అధ్యక్షుడు సత్య యాదవ్‌, భాస్కర్‌, ఎన్‌హెచ్‌ఎం యూనియన్ గౌరవ అధ్యక్షులు బిక్షపతి, అధ్యక్షుడు ప్రసాద్, ప్రధాన కార్యదర్శి వెంకట రమణ, కోశాధికారి రాఘవేందర్‌ సభ్యులు నరసింహారావు సగరి, మోనేష్ చారి, తిరుపతి, విరోజ, నవీన, శ్రీలత, అర్చన, ఐశ్వర్య, నవ్య దీప్తి, శ్వేత శ్రీ, రామస్వామి, వినోద్, గాయత్రి, అజారుద్దీన్, ఆశ బి, రామేశ్వరి, అపర్ణ, నాగజ్యోతి, పుష్ప, సుమిత్ర, అలివేలు పాల్గొన్నారు.

– రాజేష్ కుమార్, సూర్య రిపోర్టర్, నారాయణపేట.