గడువు ముగిసిన వైన్‌షాప్‌.. ధాబాలో మద్యం విక్రయాలా?
గన్నవరం, అక్టోబర్ 2, మేజర్ న్యూస్.
గన్నవరం మండలం కేసరపల్లి పరిధిలోని బాబీ ధాబాలో అక్రమంగా మద్యం విక్రయాలు జరుగుతున్నాయన్న ఆరోపణలు కలకలం రేపుతున్నాయి. ధాబాలో ప్రత్యేకంగా కౌంటర్ ఏర్పాటు చేసి మద్యం విక్రయిస్తున్నారని, నిర్ణీత ధరల కంటే అధిక ధరలకు విక్రయిస్తున్నారని మద్యం ప్రియులు ఆరోపిస్తున్నారు. ధాబాకు సమీపంలో ఉన్న చిల్లీస్ వైన్‌షాప్‌ గడువు సెప్టెంబర్ 30 తో ముగిసిన నేపథ్యంలో, ఆ తర్వాత బాబీ ధాబాలో పెద్ద ఎత్తున మద్యం నిల్వ చేసి విక్రయిస్తున్నారన్న ఆరోపణలు వినిపిస్తున్నాయి. అధిక ధరలకు మద్యం విక్రయించడంపై కొందరు మద్యం ప్రియులు ధాబా నిర్వాహకులను ప్రశ్నించడంతో ఇరువర్గాల మధ్య వాగ్వాదం చోటుచేసుకున్నట్లు సమాచారం. స్థానికులు జోక్యం చేసుకోవడంతో పరిస్థితి సద్దుమణిగిందని, మద్యం విక్రయిస్తున్నారని ఆరోపణలు ఎదుర్కొంటున్న వ్యక్తులు అక్కడి నుంచి వెళ్లిపోయారని స్థానికులు చెబుతున్నారు. ఈ ఘటనపై సమాచారం అందుకున్న గన్నవరం ఎక్సైజ్‌ అధికారులు ధాబాను పరిశీలించినప్పటికీ, భారీగా మద్యం నిల్వలు ఉన్నాయన్న ఆరోపణలపై ఎలాంటి స్పష్టమైన చర్యలు తీసుకున్నారో వెల్లడించాల్సి ఉంది. ధాబాలో మద్యం నిల్వలు, విక్రయాలకు అనుమతులు ఉన్నాయా? అనే అంశాలపై సమగ్ర విచారణ జరిపి వాస్తవాలను వెలుగులోకి తేవాలని స్థానికులు కోరుతున్నారు.
