ఎఫ్ఎఫ్ఎస్ యాప్ను సద్వినియోగం చేసుకోవాలి
- రైతులకు యాప్ వినియోగంపై అవగాహన కల్పించిన జిల్లా వ్యవసాయ అధికారి బాలాజీ నాయక్
పామూరు, మేజర్ న్యూస్ : ఎరువుల కొనుగోలులో రైతులకు మరింత సౌలభ్యం కల్పించడంతో పాటు విక్రయాల్లో పారదర్శకత తీసుకురావడమే లక్ష్యంగా కేంద్ర ప్రభుత్వం ఎఫ్ఎఫ్ఎస్ యాప్ను అందుబాటులోకి తీసుకొచ్చిందని జిల్లా వ్యవసాయ అధికారి బాలాజీ నాయక్ అన్నారు. బుధవారం పామూరు పట్టణంలోని ముప్పసాని శ్రీనివాసులు ఫర్టిలైజర్స్ దుకాణాన్ని కనిగిరి ఏడీఏ జైన్ లుద్దీన్తో కలిసి ఆయన పరిశీలించారు. ఈ సందర్భంగా దుకాణానికి వచ్చిన రైతులతో మాట్లాడి ఎఫ్ఎఫ్ఎస్ యాప్ వినియోగం దాని ద్వారా ఎరువుల కొనుగోలు చేసే విధానంపై అవగాహన కల్పించారు. రైతులు ఎరువుల కోసం దుకాణాల వద్ద ఇబ్బందులు పడకుండా ప్రభుత్వం నిర్దేశించిన ఆన్లైన్ విధానాన్ని ఉపయోగించుకోవాలని సూచించారు. యాప్ ద్వారా ఎరువుల విక్రయాలు పారదర్శకంగా సాగుతాయని ప్రతి రైతుకు అవసరమైన ఎరువులు సక్రమంగా అందించేందుకు ఈ విధానం దోహదపడుతుందని వివరించారు. రైతులు యాప్ వినియోగంపై అవగాహన పెంచుకొని వ్యవసాయ శాఖ సూచనలను పాటించాలని కోరారు. ఈ కార్యక్రమంలో మండల వ్యవసాయాధికారి అబ్రహం లింకన్, విస్తరణాదికారి నగేష్, ముప్పసాని శ్రీనివాసులు ఫర్టిలైజర్స్ అధినేత ముప్పసాని క్రాంతి, రైతులు పాల్గొన్నారు.