ఏపీ ఓఎస్ఎస్ ప్రవేశాలపై ప్రత్యేక కార్యాచరణ

ఎడ్యుకేషన్ స్టాఫ్ రిపోర్టర్ : తిరుపతి జిల్లాలో 2026–27 విద్యా సంవత్సరానికి సంబంధించి ఆంధ్రప్రదేశ్ సార్వత్రిక విద్యాపీఠం ద్వారా పదవ తరగతి, ఇంటర్మీడియట్ కోర్సుల్లో ప్రవేశాల సంఖ్యను గణనీయంగా పెంచి, నిర్దేశించిన లక్ష్యాలను పూర్తి స్థాయిలో సాధించాలని జిల్లా విద్యాశాఖాధికారి కేవీఎన్ కుమార్ ఆదేశించారు. జిల్లా విద్యాశాఖాధికారి ఆధ్వర్యంలో ఏపీఓఎస్ఎస్ ఎన్‌రోల్‌మెంట్ డ్రైవ్‌పై డివైఈవో, మండల విద్యాశాఖాధికారులు, పాఠశాలల ప్రధానోపాధ్యాయులు, ఏపీఓఎస్ఎస్ ఏఐ కోఆర్డినేటర్లతో ఆయన మంగళవారం సమీక్షా సమావేశం నిర్వహించారు. ఈ సందర్భంగా జిల్లా విద్యాశాఖాధికారి మాట్లాడుతూ వివిధ కారణాల వల్ల మధ్యలోనే చదువు మానేసిన విద్యార్థులు, పదో తరగతి, ఇంటర్మీడియట్ పరీక్షల్లో ఉత్తీర్ణత సాధించని విద్యార్థులను గుర్తించి, వారికి ఏపీఓఎస్ఎస్ ద్వారా తిరిగి విద్యను కొనసాగించే అవకాశాన్ని కల్పించాలని సూచించారు. విద్యకు దూరమైన ప్రతి ఒక్కరికీ మళ్లీ చదువుకునే అవకాశం కల్పించడమే ఏపీఓఎస్ఎస్ ప్రధాన లక్ష్యంమన్నారు. అర్హులైన ప్రతి అభ్యర్థిని గుర్తించి చేర్పించేందుకు అధికారులు, ప్రధానోపాధ్యాయులు, ఏఐ కోఆర్డినేటర్లు సమన్వయంతో పనిచేయాలని కోరారు. నిర్దేశించిన లక్ష్యాలను గడువులోగా 100 శాతం సాధించాలని, ఎటువంటి నిర్లక్ష్యం వహించరాదని స్పష్టం చేశారు. చదువు మానేసిన, ఫెయిల్ అయిన విద్యార్థులను గుర్తించి ఏపీఓఎస్ఎస్ లో చేర్పించాలని, ప్రతి మండలంలో ఎన్‌రోల్‌మెంట్ డ్రైవ్ చేపట్టి, రోజువారీ పురోగతిని నివేదించాలని ఆదేశించారు. 

సీఎం గౌడ్ తిరుపతి స్టాప్ రిపోర్టర్