ఎమ్మెల్యే బీవీ పై చల్లా వరుణ్ వ్యాఖ్యలు అర్థరహితం.. దామా

ఎమ్మిగనూరు, సూర్య ప్రతినిధి ఎమ్మెల్యే డాక్టర్ బీవీ జయ నాగేశ్వర్ రెడ్డిపై జనసేన నాయకుడిగా చెప్పుకుంటున్న చల్లా వరుణ్ చేసిన అనుచిత వ్యాఖ్యలను టీడీపీ పట్టణ ప్రధాన కార్యదర్శి దామా నరసింహులు తీవ్రంగా ఖండించారు. కూటమి ధర్మంలో భాగంగానే జనసేనకు సీటు కేటాయించడం జరిగిందనే విషయాన్ని చల్లా వరుణ్ గుర్తుంచుకోవాలని హితవు పలికారు.
2024 ఎన్నికలకు ముందు చల్లా వరుణ్ జనసేన పార్టీలో ఉన్న విషయం కూడా తమకు తెలియదని, ఒకవేళ పార్టీలో ఉన్నట్లయితే కూటమి ధర్మాన్ని పాటిస్తూ అభ్యర్థి విజయానికి ఎందుకు కృషి చేయలేదని ప్రశ్నించారు. జనసేన ఇన్‌చార్జి రేఖాగౌడ్‌తో పాటు, ఎంపీటీసీ అభ్యర్థిగా పోటీ చేసిన సపోవు భాస్కర్ తదితరులు ఎన్నికల సమయంలో కూటమి అభ్యర్థిగా బరిలో నిలిచిన ఎమ్మెల్యే బీవీ జయ నాగేశ్వర్ రెడ్డి విజయానికి ఎంతో కృషి చేశారని పేర్కొన్నారు.
కూటమి కోసం కష్టపడిన నాయకులు ఎమ్మెల్యేపై విమర్శలు చేయడం లేదని, చల్లా వరుణ్ మాత్రం వైసీపీ కోవర్టుగా వ్యవహరిస్తూ మాట్లాడుతున్నారని దామా నరసింహులు ఆరోపించారు. కూటమి ఐక్యతకు భంగం కలిగించే వ్యాఖ్యలు చేయడం సరికాదని, నాయకులు బాధ్యతాయుతంగా వ్యవహరించాలని ఆయన సూచించారు.
A R శరత్ కుమార్ సూర్య ప్రతినిధి ఎమ్మిగనూరు కర్నూలు జిల్లా