‘పేదల సేవలో’ సంక్షేమ పథకాల కన్వర్జెన్స్‌పై సీఎం చంద్రబాబు సమీక్ష..
సూర్య అమరావతి బ్యూరో: ఆంధ్రప్రదేశ్‌లో సంక్షేమ పథకాలు అర్హులైన ప్రతి పేదవాడి గడపకూ పారదర్శకంగా చేరడమే లక్ష్యంగా ముఖ్యమంత్రి నారా చంద్రబాబు నాయుడు ఉన్నత స్థాయి జూమ్ సమీక్షా సమావేశం (Zoom Conference) నిర్వహించారు. ‘పేదల సేవలో – సంక్షేమ కార్యక్రమాల కన్వర్జెన్స్’ (Convergence of Welfare Schemes) అనే అంశంపై వెలగపూడి సచివాలయం నుంచి నిర్వహించిన ఈ వర్చువల్ సమావేశంలో రాష్ట్ర మంత్రులు, ఎంపీలు, ఎమ్మెల్యేలు, ప్రజాప్రతినిధులు, అన్ని జిల్లాల కలెక్టర్లు, జాయింట్ కలెక్టర్లు మరియు ఉన్నతాధికారులు పెద్ద ఎత్తున పాల్గొన్నారు.
పథకాల కలయికతోనే సమగ్ర పేదరిక నిర్మూలన: సీఎం చంద్రబాబు:వివిధ శాఖల ద్వారా అమలవుతున్న సంక్షేమ కార్యక్రమాలను సమన్వయం (కన్వర్జెన్స్) చేస్తూ సీఎం ప్రజాప్రతినిధులు, అధికారులకు దిశానిర్దేశం చేశారు.విభాగాల మధ్య సమన్వయం తప్పనిసరి:సంక్షేమం, గ్రామీణాభివృద్ధి, గృహ నిర్మాణం, వైద్యారోగ్యం, వ్యవసాయం వంటి విభాగాలు వేర్వేరుగా కాకుండా ఒకదానితో ఒకటి అనుసంధానమై పనిచేయాలని స్పష్టం చేశారు. పథకాలన్నింటినీ సమగ్రంగా జోడించినప్పుడే పేద కుటుంబాల జీవన ప్రమాణాలు వేగంగా మెరుగవుతాయని తెలిపారు.
అర్హతే ప్రామాణికం – రాజకీయాలకు తావులేదు:కుల, మత, రాజకీయ వర్గాలకు అతీతంగా అర్హత ఉన్న ప్రతి ఒక్కరికీ ప్రభుత్వ ప్రయోజనాలు అందాలని, సంక్షేమ పంపిణీలో ఎక్కడా అవినీతి లేదా వివక్షకు ఆస్కారం ఉండకూడదని అధికారులను గట్టిగా ఆదేశించారు.
క్షేత్రస్థాయిలోనే ప్రజాప్రతినిధులు, యంత్రాంగం:కేవలం కార్యాలయాలకే పరిమితం కాకుండా ఎమ్మెల్యేలు, క్షేత్రస్థాయి అధికారులు ప్రజల వద్దకు వెళ్లి సమస్యలను ప్రత్యక్షంగా తెలుసుకోవాలని సూచించారు. గ్రామ స్థాయిలో పెండింగ్‌లో ఉన్న దరఖాస్తులను తక్షణమే పరిష్కరించేలా కార్యాచరణ రూపొందించాలని కలెక్టర్లకు ఆదేశాలు జారీ చేశారు.
సాంకేతికతతో పారదర్శక పర్యవేక్షణ:సంక్షేమ పథకాల అమలు, నిధుల వినియోగంపై పూర్తిస్థాయి డిజిటల్ ట్రాకింగ్ విధానాన్ని అమలు చేస్తున్నామని, ప్రతి పైసా నేరుగా లబ్ధిదారులకే చేరేలా కట్టుదిట్టమైన వ్యవస్థను నిర్మిస్తున్నామని సీఎం వెల్లడించారు.
సమావేశంలో పాల్గొన్న జిల్లా కలెక్టర్లు తమ జిల్లాల్లో అమలవుతున్న అభివృద్ధి పనులు, పెన్షన్ల పంపిణీ, పీ4 మోడల్ కార్యాచరణ మరియు గృహ నిర్మాణ పురోగతి వివరాలను ముఖ్యమంత్రికి నివేదించారు.
