చిత్తూరులో తెలుగుదేశం పార్టీకి భారీ షాక్ - నగర నాయకత్వం  వైకాపాలోకి జంప్ - మాజీ నగర అధ్యక్షుడు తుంగా నరేష్ చౌదరి సహా ఐదుగురు కీలక నేతల పార్టీ మార్పు - ఎం.సి. విజయానందరెడ్డి సమక్షంలో కండువాలు

చిత్తూరు అర్బన్, మేజర్ న్యూస్:

చిత్తూరు నగరపాలక సంస్థ ఎన్నికల వేళ తెలుగుదేశం పార్టీకి ఊహించని ఎదురుదెబ్బ తగిలింది. నగరంలో పార్టీని నడిపించిన కీలక నాయకులు ఒకేసారి పార్టీని వీడి వైఎస్ఆర్ కాంగ్రెస్ పార్టీలో చేరడం కలకలం రేపుతోంది.

చిత్తూరు వైఎస్ఆర్ కాంగ్రెస్ పార్టీ ఇన్చార్జి ఎం.సి. విజయానందరెడ్డి సమక్షంలో ఆదివారం ఈ చేరికల కార్యక్రమం ఘనంగా జరిగింది. తెలుగుదేశం పార్టీ మాజీ నగర అధ్యక్షుడు తుంగా నరేష్ చౌదరి, ఎస్సీ విభాగ అధ్యక్షుడు రవి, యూనిట్ ఇన్చార్జి తుంగా వినోద్ చౌదరి, 50వ డివిజన్ అధ్యక్షుడు మంజేష్ కుమార్ అలియాస్ కుట్టి, 50వ వార్డు ఎస్సీ విభాగ నాయకుడు సుందర్ తమ అనుచరులతో కలిసి వైఎస్ఆర్ కాంగ్రెస్ పార్టీలో చేరారు. ఎం.సి. విజయానందరెడ్డి వారికి పార్టీ కండువా కప్పి సాదరంగా ఆహ్వానించారు. ఈ సందర్భంగా మాట్లాడిన తుంగా నరేష్ చౌదరి తెలుగుదేశం పార్టీలో కార్యకర్తలకు, నాయకులకు గౌరవం లేదని, నగరంలో నాయకత్వం సరైన దిశలో లేదని ఆవేదన వ్యక్తం చేశారు. వైఎస్ జగన్ నాయకత్వం, ఎం.సి. విజయానందరెడ్డి పనితీరు నచ్చి వైఎస్ఆర్ కాంగ్రెస్ పార్టీలో చేరుతున్నట్లు తెలిపారు. ఎం.సి. విజయానందరెడ్డి మాట్లాడుతూ పార్టీలోకి వచ్చిన ప్రతి ఒక్కరికి తగిన గౌరవం, ప్రాధాన్యత ఇస్తామని హామీ ఇచ్చారు. వారి రాకతో నగరంలో వైఎస్ఆర్ కాంగ్రెస్ పార్టీ మరింత బలోపేతం అవుతుందని, రానున్న నగరపాలక సంస్థ ఎన్నికల్లో వైఎస్ఆర్ కాంగ్రెస్ పార్టీ విజయం ఖాయమని ధీమా వ్యక్తం చేశారు. ఈ కార్యక్రమంలో వైఎస్ఆర్ కాంగ్రెస్ పార్టీ నగర నాయకులు, కార్యకర్తలు పెద్ద సంఖ్యలో పాల్గొన్నారు.