చేనేత కుటుంబాల సంక్షేమమే లక్ష్యం.. నేతన్నలకు అండగా ఉంటా స్వతంత్ర అభ్యర్థి డి. నజీర్ అహ్మద్

ఎమ్మిగనూరు సూర్య ప్రతినిధి:చేనేత కుటుంబాల సంక్షేమం, నేతన్నల అభ్యున్నతి, పట్టణ సమగ్ర అభివృద్ధే తన ప్రధాన లక్ష్యమని ఎమ్మిగనూరు మున్సిపల్ చైర్మన్ స్వతంత్ర అభ్యర్థి, మాజీ మున్సిపల్ వైస్ చైర్మన్ డి. నజీర్ అహ్మద్ పేర్కొన్నారు. బుధవారం పట్టణంలోని శివన్న నగర్, అబ్బాస్ టాకీస్, ఎన్టీఆర్ కాలనీలలో ఆయన విస్తృతంగా ఎన్నికల ప్రచారం నిర్వహించారు.ఈ సందర్భంగా చేనేత కార్మికులను, నేతన్న కుటుంబాలను ఆప్యాయంగా పలకరిస్తూ వారి సమస్యలను అడిగి తెలుసుకున్నారు. చేనేత రంగం ఎన్నో కుటుంబాలకు జీవనాధారమని, తరతరాలుగా వస్తున్న ఈ సంప్రదాయ వృత్తిని కాపాడుకోవాల్సిన అవసరం ఉందని పేర్కొన్నారు.చేనేత కార్మికులు ఎదుర్కొంటున్న ఆర్థిక ఇబ్బందులు, పెరుగుతున్న ఉత్పత్తి ఖర్చులు, ఉపాధి సమస్యల పరిష్కారానికి ప్రత్యేక శ్రద్ధ చూపాల్సిన అవసరం ఉందన్నారు. నేతన్నల సమస్యలను సంబంధిత అధికారుల దృష్టికి తీసుకెళ్లడంతో పాటు, మున్సిపాలిటీ పరిధిలో పరిష్కరించగల సమస్యలను పరిష్కరించేందుకు తన వంతు కృషి చేస్తానని హామీ ఇచ్చారు.చేనేత కుటుంబాల సంక్షేమం, నేతన్నల గౌరవం, వారి పిల్లల భవిష్యత్తు, కాలనీల్లో మౌలిక సదుపాయాల అభివృద్ధికి ప్రాధాన్యత ఇస్తానని తెలిపారు. ప్రజలకు ఎల్లప్పుడూ అందుబాటులో ఉంటూ, ప్రజా సమస్యల పరిష్కారానికి కృషి చేసే నాయకుడిగా నిలుస్తానని స్పష్టం చేశారు.రానున్న ఎన్నికల్లో చేనేత కుటుంబాలు, పట్టణ ప్రజలు తనకు మద్దతుగా నిలిచి స్వతంత్ర అభ్యర్థిగా గెలిపించాలని డి. నజీర్ అహ్మద్ విజ్ఞప్తి చేశారు. నేతన్నల సంక్షేమం, ప్రజల అభ్యున్నతి, ఎమ్మిగనూరు పట్టణ సమగ్ర అభివృద్ధి కోసం కృషి చేస్తానని ఆయన పేర్కొన్నారు.
A. R. శరత్ కుమార్ సూర్య ప్రతినిధి ఎమ్మిగనూరు, కర్నూలు జిల్లా