బ్యాడ్మింటన్ క్రీడలకు తణుకును ప్రత్యేక వేదికగా తీర్చిదిద్దాలి జాతీయ, అంతర్జాతీయ స్థాయిలో రాణించే క్రీడాకారులను తయారు చేయడమే లక్ష్యం త్వరలో ఏడు బ్యాడ్మింటన్ కోర్టులు అందుబాటులోకి గోపీచంద్, పీవీ సింధులను ఆదర్శంగా తీసుకోవాలి: ఎమ్మెల్యే ఆరిమిల్లి రాధాకృష్ణ

తణుకు, సూర్య న్యూస్ :బ్యాడ్మింటన్ క్రీడల్లో తణుకుకు రాష్ట్రస్థాయిలో ప్రత్యేక గుర్తింపు తీసుకురావడంతో పాటు జాతీయ, అంతర్జాతీయ స్థాయిలో రాణించే క్రీడాకారులను తీర్చిదిద్దేందుకు అవసరమైన మౌలిక సదుపాయాల కల్పనకు కృషి చేస్తున్నట్లు తణుకు ఎమ్మెల్యే ఆరిమిల్లి రాధాకృష్ణ తెలిపారు.

శుక్రవారం స్థానిక కొండేపాటి సరోజినీ దేవి మహిళా కళాశాలలో నిర్వహించిన అండర్‌-17 బ్యాడ్మింటన్ టోర్నమెంట్‌లో ఆయన పాల్గొని క్రీడాకారులను ఉద్దేశించి ప్రసంగించారు. ప్రతిభావంతులైన క్రీడాకారులకు సరైన శిక్షణ, ప్రోత్సాహం అందిస్తే తణుకు నుంచి మరింతమంది జాతీయ, అంతర్జాతీయ క్రీడాకారులు వెలుగులోకి వస్తారని ఆకాంక్షించారు.క్రీడాభివృద్ధిలో భాగంగా తణుకు మున్సిపల్ కాంప్లెక్స్‌లో ఇప్పటికే రెండు బ్యాడ్మింటన్ కోర్టులు అందుబాటులో ఉన్నాయని, శాప్ నిధులతో మరో రెండు కోర్టులను నిర్మించి రెండు నెలల్లో అందుబాటులోకి తీసుకురానున్నట్లు వెల్లడించారు. ఇతర కోర్టులతో కలిపి పట్టణంలో మొత్తం ఏడు బ్యాడ్మింటన్ కోర్టులు అందుబాటులోకి రానున్నాయని వివరించారు.తణుకు ప్రాంతానికి చెందిన హేమశ్రీ ఆసియా స్థాయి బ్యాడ్మింటన్ పోటీల్లో విజయం సాధించడం స్థానిక క్రీడాకారులకు స్ఫూర్తిదాయకమన్నారు. గోపీచంద్, పీవీ సింధు వంటి దిగ్గజ క్రీడాకారులను ఆదర్శంగా తీసుకొని ఉన్నత శిఖరాలను అధిరోహించాలని సూచించారు.క్రీడల్లో గెలుపోటముల కంటే క్రమశిక్షణ, పట్టుదల, నిరంతర సాధన ముఖ్యమని ఎమ్మెల్యే పేర్కొన్నారు. ఓటములను విజయానికి సోపానాలుగా మలుచుకోవాలని, తల్లిదండ్రులు సైతం పిల్లల్లోని క్రీడా ప్రతిభను గుర్తించి ప్రోత్సహించాలని కోరారు.బ్యాడ్మింటన్ అభివృద్ధికి కృషి చేస్తున్న నిర్వాహక కార్యదర్శి సతీష్‌బాబు, కోచ్‌ల సేవలను ఎమ్మెల్యే అభినందించారు. భవిష్యత్తులో బ్యాడ్మింటన్ క్రీడలకు తణుకు ఒక ప్రత్యేక కేంద్రంగా ఎదగాలన్నదే తన ఆకాంక్ష అని ఆరిమిల్లి రాధాకృష్ణ స్పష్టం చేశారు.

రిపోర్టర్. అనుకుమార్..తణుకు. ..పశ్చిమగోదావరి జిల్లా.