మున్సిపాల్టీల్లో నామినేషన్ల ప్ర‌క్రియ ప్రారంభం
విజయనగరం, సూర్య : విజయనగరం కార్పొరేషన్, బొబ్బిలి మున్సిపాలిటీ, నెల్లిమ‌ర్ల న‌గ‌ర పంచాయితీలో నామినేషన్ల ప్ర‌క్రియ శుక్ర‌వారం ప్రారంభ‌మ‌య్యింది. ఆయా మున్సిపాల్టీల రిట‌ర్నింగ్ అధికారులు నోటీసు జారీ చేసిన వెంట‌నే, నామినేషన్ల స్వీకరణకు శ్రీ‌కారం చుట్టారు. మేయర్, మున్సిప‌ల్ ఛైర్మ‌న్ ప‌ద‌వుల‌కు ప్ర‌త్య‌క్ష ఎన్నిక‌లు జ‌ర‌గ‌నుండ‌టంతో, వార్డు స‌భ్యుల‌తోపాటు, మేయర్, ఛైర్మ‌న్ స్థానాల‌కు కూడా వేరుగా నామినేష‌న్ల‌ను స్వీక‌రించ‌డానికి ప్ర‌త్యేకంగా కౌంట‌ర్ల‌ను ఏర్పాటు చేశారు. విజయనగరం కార్పొరేషన్ ప‌రిధిలోని 62 వార్డుల‌కు, మేయర్ ప‌ద‌వికి వేర్వేరుగా నామినేష‌న్ల‌ను స్వీక‌రిస్తున్నారు. అలాగే బొబ్బిలి మున్సిపాలిటీ పరిధిలో 36 వార్డుల‌కు, ఛైర్మ‌న్ ప‌ద‌వికి, నెల్లిమ‌ర్ల న‌గ‌ర పంచాయితీలోని 23 వార్డుల‌కు, ఛైర్‌ప‌ర్స‌న్ ప‌ద‌వికి నామినేషన్ల స్వీక‌ర‌ణ ప్ర‌క్రియ ప్రారంభ‌మ‌య్యింది.
మొద‌టిరోజు విజయనగరం కార్పొరేష‌న్‌లో మేయర్ స్థానానికి ఒక నామినేష‌న్‌, వార్డు స‌భ్యుల‌కు 18 నామినేషన్లు దాఖ‌ల‌య్యాయి. బొబ్బిలిలో వార్డు స‌భ్యుల స్థానాల‌కు 6 నామినేషన్లు వ‌చ్చాయి. నెల్లిమ‌ర్ల‌లో ఛైర్మ‌న్ స్థానానికి రెండు, వార్డు స‌భ్యుల స్థానాల‌కు 8 నామినేషన్లు దాఖ‌ల‌య్యాయి. నామినేషన్ల స్వీకరణకు అక్టోబర్ 18 చివరి తేదీ. అక్టోబర్ 19న నామినేషన్ల పరిశీలన, అక్టోబర్ 21న నామినేషన్ల ఉపసంహరణ, తుది అభ్యర్థుల జాబితా ప్రకటన ఉంటాయి. అక్టోబర్ 28న పోలింగ్, అవసరమైన చోట అక్టోబర్ 29న రీపోలింగ్ నిర్వహిస్తారు. అక్టోబర్ 30న ఓట్ల లెక్కింపు చేపట్టి ఫలితాలు ప్రకటిస్తారు.
విజయనగరం కార్పొరేష‌న్‌లో నామినేషన్ల ప్ర‌క్రియ కోసం చేసిన ఏర్పాట్ల‌ను జిల్లా ఎన్నిక‌ల అధికారి, క‌లెక్ట‌ర్ ఎస్‌.రాంసుంద‌ర్ రెడ్డి శుక్ర‌వారం ప‌రిశీలించారు. మున్సిప‌ల్ క‌మిష‌న‌ర్‌, ఇత‌ర అధికారుల‌కు ప‌లు సూచ‌న‌లు చేశారు. ఎన్నిక‌ల క‌మిష‌న్ ఆదేశాల‌కు అనుగుణంగా ఈ ప్రక్రియను పూర్తి చేయాల‌ని, నిబంధ‌న‌ల‌కు ఎక్క‌డా ఉల్లంఘించ‌కూడ‌ద‌ని ఆదేశించారు. ఎన్నిక‌ల ప్ర‌వ‌ర్త‌నా నియ‌మావ‌ళిని ఖ‌ఛ్చితంగా అమ‌లు చేయాల‌ని క‌లెక్ట‌ర్ స్ప‌ష్టం చేశారు.
రిపోర్టర్ : డేవిడ్ రాజు, విజయనగరం.
