నందిగామ గౌడ్ హాస్టల్‌ ప్రారంభోత్సవంలో కాటా శ్రీనివాస్‌ గౌడ్ -మంత్రి పొన్నం ప్రభాకర్‌, టీపీసీసీ అధ్యక్షుడు మహేష్‌ కుమార్‌ గౌడ్‌తో కలిసి నూతన భవనం ప్రారంభం
పటాన్‌చెరు;పటాన్‌చెరు మండలం నందిగామ గ్రామంలో గౌడ్ విద్యార్థుల కోసం నూతనంగా నిర్మించిన హాస్టల్‌ భవనాన్ని శుక్రవారం ఘనంగా ప్రారంభించారు. రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్‌, టీపీసీసీ అధ్యక్షుడు బొమ్మ మహేష్‌ కుమార్‌ గౌడ్‌తో కలిసి పటాన్‌చెరు నియోజకవర్గ కాంగ్రెస్ పార్టీ ఇన్‌ఛార్జి కాటా శ్రీనివాస్‌ గౌడ్ ఈ కార్యక్రమంలో పాల్గొని నూతన భవనాన్ని ప్రారంభించారు.ఈ సందర్భంగా విద్యార్థులకు మెరుగైన వసతి సౌకర్యాలు కల్పించడంలో హాస్టళ్లు కీలక పాత్ర పోషిస్తాయని నాయకులు పేర్కొన్నారు. విద్యార్థులు ప్రశాంతమైన వాతావరణంలో ఉంటూ చదువుపై దృష్టి సారించేందుకు ఇటువంటి వసతి గృహాలు ఎంతగానో ఉపయోగపడతాయని తెలిపారు.గౌడ్ విద్యార్థులు విద్యారంగంలో ఉన్నత స్థాయికి చేరుకోవడంతో పాటు పోటీ పరీక్షల్లో రాణించి ఉన్నత ఉద్యోగాలు సాధించాలని నాయకులు ఆకాంక్షించారు. విద్యార్థుల అభ్యున్నతికి అవసరమైన వసతి, విద్యా సదుపాయాల కల్పనకు సమాజంలోని ప్రతి ఒక్కరూ సహకరించాలని పిలుపునిచ్చారు.నందిగామలో నూతన హాస్టల్‌ భవనం అందుబాటులోకి రావడంతో విద్యార్థులకు వసతి పరంగా మరింత ప్రయోజనం చేకూరనుంది. ఈ కార్యక్రమంలో పలువురు గౌడ్ సంఘం నాయకులు, ప్రజాప్రతినిధులు, స్థానిక నాయకులు పాల్గొన్నారు.
