బొగ్గు బట్టీల్లో వెట్టిచాకిరీకి విముక్తి
సూర్య కలెక్టరేట్ రిపోర్టర్ అనంతపురం జిల్లాలోని బొమ్మనహాళ్, డి.హీరేహాళ్ మండలాల్లో బొగ్గు బట్టీలపై అధికారులు నిర్వహించిన ప్రత్యేక తనిఖీల్లో 95 మంది ఆదివాసీ వలస కూలీలను వెట్టిచాకిరీ నుంచి విముక్తి కల్పించారు. వీరిలో మహిళలు, వృద్ధులతో పాటు మూడో వంతుకు పైగా చిన్నారులు ఉన్నట్లు అధికారులు తెలిపారు. మహారాష్ట్రలోని రాయ్‌గడ్ జిల్లాకు చెందిన వీరిని అడ్వాన్సుల పేరుతో నిర్బంధించి బలవంతంగా పని చేయిస్తున్నట్లు కూలీలు వెల్లడించారు
అధికారులు వీరికి విడుదల పత్రాలు అందజేసి, ఏపీఎస్‌ఆర్టీసీ బస్సుల ద్వారా స్వస్థలమైన రాయ్‌గడ్ జిల్లాకు తరలించారు. వెట్టిచాకిరీ నిరోధక చట్టం కింద యాజమాన్యాలపై కేసులు నమోదు చేసి చట్టపరమైన చర్యలు చేపట్టాలని పోలీసులను కోరారు. జిల్లాలోని ఇటుక బట్టీలు, క్వారీలు, రైస్ మిల్లులు, వ్యవసాయ క్షేత్రాల్లోనూ త్వరలో విస్తృత తనిఖీలు చేపట్టనున్నట్లు కార్మిక శాఖ అధికారులు తెలిపారు.
వేణుగోపాల్ నేటి దినపత్రిక
