భోగాపురం విద్యుత్ అవసరాలపై ప్రత్యేక దృష్టి
భోగాపురం విద్యుత్ అవసరాలపై ప్రత్యేక దృష్టి
విద్యుత్ సరఫరా వ్యవస్థను బలోపేతం చేయాలి: మంత్రి గొట్టిపాటి రవికుమార్
భోగాపురం విమానాశ్రయానికి విద్యుత్ సమస్యలు లేకుండా చూడాలి: మంత్రి గొట్టిపాటి రవికుమార్
ఏపీ స్టేట్ బ్యూరో, అమరావతి :
భవిష్యత్ అవసరాలను దృష్టిలో ఉంచుకుని విద్యుత్ సరఫరా వ్యవస్థను బలోపేతం చేయాలని విద్యుత్ శాఖ మంత్రి గొట్టిపాటి రవికుమార్ అధికారులను ఆదేశించారు. విశాఖపట్నంలో విద్యుత్ శాఖ ఉన్నతాధికారులతో మంత్రి సమీక్ష నిర్వహించారు. ఈ సమీక్షకు విజయనగరం, విశాఖపట్నం జిల్లాలకు చెందిన విద్యుత్ శాఖ అధికారులు హాజరయ్యారు. రెండు జిల్లాల పరిధిలో కొనసాగుతున్న వివిధ విద్యుత్ ప్రాజెక్టులు, విద్యుత్ సరఫరా పరిస్థితిపై అధికారులతో మంత్రి చర్చించారు. అభివృద్ధి చెందుతున్న భోగాపురం ప్రాంతంలో విద్యుత్ సమస్యలు తలెత్తకుండా ముందస్తు చర్యలు చేపట్టాలని సూచించారు. భోగాపురం అంతర్జాతీయ విమానాశ్రయానికి విద్యుత్ సరఫరాలో ఎలాంటి అంతరాయం లేకుండా పటిష్టమైన ఏర్పాట్లు చేయాలని ఆదేశించారు. రానున్న రోజుల్లో పెరగనున్న పారిశ్రామిక అవసరాలను గుర్తించి అందుకు అనుగుణంగా విద్యుత్ సరఫరా వ్యవస్థను బలోపేతం చేయాలని అధికారులకు సూచించారు. ఇరు జిల్లాల పరిధిలో పీఎం సూర్యఘర్ పథకం పనుల పురోగతిని అధికారులు మంత్రికి వివరించారు. సూర్యఘర్, ఆర్డీఎస్ఎస్ పనులను త్వరితగతిన పూర్తి చేసి ప్రజలకు ప్రయోజనం చేకూరేలా చర్యలు తీసుకోవాలని మంత్రి గొట్టిపాటి రవికుమార్ ఆదేశించారు.
