బీసీ కాలనీలో స్థల వివాదం.. జేసీబీతో హడావుడిగా చదును!

సైదాపురం మండలం, మేజర్ న్యూస్ :  సైదాపురం మండల కేంద్రంలోని బీసీ కాలనీలో ఆదివారం స్థల వివాదం తీవ్ర ఉద్రిక్తతకు దారితీసింది. పంచాయతీకి చెందిన స్థలంగా అధికారులు పేర్కొంటున్న ప్రాంతంపై రెండు వర్గాల మధ్య హక్కులు, వినియోగానికి సంబంధించి వివాదం చెలరేగింది. సుమారు 50 ఏళ్లుగా తాము ఆ స్థలాన్ని వినియోగించుకుంటున్నామని ఓ వర్గం చెబుతుండగా, మరోవైపు ఆ స్థలం పంచాయతీకి చెందిందనే వాదన వినిపిస్తోంది.  ఈ క్రమంలో ఆలయ నిర్మాణం చేపట్టాలనే ఉద్దేశంతో అధికార పార్టీకి చెందిన కొందరు నాయకులు జేసీబీని తీసుకొచ్చి స్థలంలోని చెట్లను తొలగించి చదును చేయించే ప్రయత్నం చేయడం వివాదానికి ఆజ్యం పోసింది. తమ అభ్యంతరాలను పట్టించుకోకుండా ఏకపక్షంగా పనులు చేపట్టేందుకు ప్రయత్నిస్తున్నారంటూ మరో వర్గం ఆగ్రహం వ్యక్తం చేయడంతో ఇరువర్గాల మధ్య తీవ్ర వాగ్వాదం చోటుచేసుకుంది.  సమాచారం అందుకున్న స్థానిక పోలీసులు వెంటనే సంఘటనా స్థలానికి చేరుకుని ఇరువర్గాలకు నచ్చజెప్పే ప్రయత్నం చేశారు. అయితే ఇరువర్గాలు తమ వాదనలకు కట్టుబడి ఉండటంతో పరిస్థితి వెంటనే సద్దుమణగలేదు. దీంతో బీసీ కాలనీలో కొంతసేపు ఉద్రిక్త వాతావరణం నెలకొంది.

ఎన్నికల కోడ్ అమల్లో ఉండగా ఈ హడావుడి ఎందుకు?

ప్రస్తుతం ఎన్నికల కోడ్ అమల్లో ఉన్న సమయంలో స్థలానికి సంబంధించిన హక్కులు, పంచాయతీ అనుమతులు, వివాద పరిష్కారం వంటి అంశాలపై స్పష్టత లేకుండానే జేసీబీతో చదును చేసే ప్రయత్నం చేయడం పలు అనుమానాలకు తావిస్తోంది. నిజంగా ఆలయ నిర్మాణమే లక్ష్యమైతే సంబంధిత అధికారుల అనుమతులు తీసుకుని, వివాదానికి తావులేకుండా ముందుకు వెళ్లాల్సిన అవసరం లేదా? అన్న ప్రశ్నలు స్థానికంగా వినిపిస్తున్నాయి.  ప్రజల మధ్య ఐక్యతను పెంపొందించాల్సిన పవిత్రమైన ఆలయ నిర్మాణం పేరుతో రెండు వర్గాల మధ్య విభేదాలు సృష్టించే పరిస్థితి రావడం ఎంతవరకు సమంజసమని పలువురు ప్రశ్నిస్తున్నారు. పంచాయతీ స్థలమైతే దానికి సంబంధించిన రికార్డులు బహిర్గతం చేయాలి. దశాబ్దాలుగా వినియోగంలో ఉన్న స్థలమైతే ఆ వాదనను కూడా అధికారులు పరిశీలించాలి. అంతేగానీ ఎవరి ఇష్టానుసారం వారు జేసీబీలు తీసుకొచ్చి స్థలాలను చదును చేయడం సరైన విధానం కాదనే అభిప్రాయాలు వ్యక్తమవుతున్నాయి.

అధికారులు మౌనం వీడాలి.. వాస్తవాలు వెల్లడించాలి!

ఈ స్థలానికి సంబంధించిన పంచాయతీ రికార్డులు, గత వినియోగ వివరాలు, ఆలయ నిర్మాణానికి సంబంధించిన అనుమతులపై సంబంధిత అధికారులు సమగ్ర విచారణ చేపట్టాలని స్థానికులు కోరుతున్నారు. ఎన్నికల కోడ్ అమలులో ఉన్న నేపథ్యంలో ఈ వ్యవహారంపై ఎన్నికల అధికారులు కూడా దృష్టి సారించాల్సిన అవసరం ఉందని పలువురు అభిప్రాయపడుతున్నారు.  ప్రజల మధ్య వివాదాలు పెరిగేలోపు అధికారులు జోక్యం చేసుకుని స్థల హక్కులపై స్పష్టమైన నిర్ణయం తీసుకోవాలని, రాజకీయ పలుకుబడికి తలొగ్గకుండా నిబంధనల ప్రకారం వ్యవహరించాలని కాలనీవాసులు డిమాండ్ చేస్తున్నారు.