అవాంఛనీయ సంఘటనలు జరగకుండా ప్రత్యేక పోలీస్ బందోబస్తు
నేటి దినపత్రిక సూర్య బ్యూరో రాజమహేంద్రవరం మండల పరిషత్ అధ్యక్ష, ఉపాధ్యక్ష ఎన్నికల నిర్వహణ నేపథ్యంలో తూర్పు గోదావరి జిల్లావ్యాప్తంగా పోలీసు యంత్రాంగం అప్రమత్తమైంది. ఎన్నికల ప్రక్రియ ఎలాంటి అవాంఛనీయ సంఘటనలకు తావులేకుండా ప్రశాంతంగా, పారదర్శకంగా నిర్వహించేందుకు పటిష్ట భద్రతా ఏర్పాట్లు చేపట్టినట్లు జిల్లా ఎస్పీ డి. నరసింహ కిషోర్ తెలిపారు. జిల్లాలోని అన్ని మండల పరిషత్ కార్యాలయాల వద్ద ముందస్తు భద్రతా ప్రణాళిక రూపొందించి, అవసరమైన పోలీసు బలగాలను విధుల్లో నియమించినట్లు పేర్కొన్నారు.
ఎన్నికల ప్రక్రియలో పాల్గొనే ఎంపీటీసీ సభ్యులు, ఎన్నికల అధికారులు, సిబ్బందికి ఎలాంటి ఇబ్బందులు తలెత్తకుండా తగిన భద్రత కల్పించాలని పోలీసు అధికారులను ఆదేశించారు. ఎన్నికల కేంద్రాల వద్ద అనుమతి లేని వ్యక్తుల ప్రవేశాన్ని పూర్తిస్థాయిలో నియంత్రించాలని సూచించారు. ఎన్నికల నిర్వహణకు ఆటంకం కలిగించేలా ఎవరైనా గుంపులుగా చేరడం, వాగ్వాదాలకు దిగడం, ఘర్షణలకు పాల్పడటం వంటి చర్యలకు పాల్పడితే కఠినంగా వ్యవహరించాలని స్పష్టం చేశారు.
**డ్రోన్లు, సీసీ కెమెరాలతో నిఘా**
ఎన్నికల కేంద్రాలు, వాటి పరిసర ప్రాంతాల్లో డ్రోన్లు, సీసీ కెమెరాల ద్వారా నిరంతర నిఘా ఏర్పాటు చేయనున్నారు. పరిస్థితులకు అనుగుణంగా ఆయా ప్రాంతాల్లో మొబైల్ పెట్రోలింగ్ నిర్వహించేలా చర్యలు చేపట్టనున్నారు. ఎన్నికల సమయంలో ఎక్కడైనా ఉద్రిక్త పరిస్థితులు తలెత్తే అవకాశాలున్న ప్రాంతాలను ముందుగానే గుర్తించి ప్రత్యేక నిఘా ఉంచాలని అధికారులకు సూచించారు. ప్రతి పోలీసు అధికారి తనకు కేటాయించిన ప్రాంతంలో అప్రమత్తంగా ఉంటూ విధులు నిర్వహించాలని ఆదేశించారు.
**అవాంఛనీయ ఘటనలకు తావివ్వొద్దు**
ఎన్నికల ప్రక్రియ సజావుగా సాగేందుకు పోలీసు అధికారులు పరస్పర సమన్వయంతో పనిచేయాలని ఎస్పీ సూచించారు. ఎన్నికల కేంద్రాల వద్ద శాంతిభద్రతలకు విఘాతం కలగకుండా నిరంతరం పర్యవేక్షించాలని, ఏ చిన్న సమస్య తలెత్తినా వెంటనే స్పందించి పరిస్థితిని అదుపులోకి తీసుకురావాలని ఆదేశించారు. ఎన్నికల విధుల్లో ఉన్న అధికారులు, సిబ్బంది అప్రమత్తతతో వ్యవహరిస్తూ తమ బాధ్యతలను సమర్థంగా నిర్వర్తించాలన్నారు.
**స్వేచ్ఛగా ఓటు హక్కు వినియోగించుకునేలా..**
ఎన్నికైన ప్రజాప్రతినిధులు ఎలాంటి రాజకీయ ఒత్తిళ్లు, భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకునేలా పోలీసు భద్రత కల్పించనున్నట్లు ఎస్పీ తెలిపారు. ఎన్నికల అధికారులు, సిబ్బంది విధులను సజావుగా నిర్వహించేందుకు అనుకూల వాతావరణం కల్పించాలని స్పష్టం చేశారు. ప్రజాస్వామ్యబద్ధంగా ఎన్నికల ప్రక్రియ పూర్తయ్యేలా అన్ని శాఖల అధికారులు సమన్వయంతో పనిచేయాలని సూచించారు.
ఎంపీటీసీ అధ్యక్ష, ఉపాధ్యక్ష ఎన్నికలు ప్రశాంతంగా జరిగేందుకు పోలీసు యంత్రాంగం చేపట్టిన భద్రతా చర్యలకు ప్రజలు, ప్రజాప్రతినిధులు, రాజకీయ పార్టీల నాయకులు సహకరించాలని ఎస్పీ విజ్ఞప్తి చేశారు. ఎన్నికల విధుల్లో ఉన్న పోలీసు అధికారులు, సిబ్బందికి సహకరించి శాంతిభద్రతల పరిరక్షణలో భాగస్వాములు కావాలని కోరారు.