అంతర్జాతీయ పరిశోధనలకు ఎంతో దోహదం -ఎస్వీయూలో అత్యాధునిక పరిశోధనా పరికరాలు ప్రారంభం : ఆప్సి చైర్మన్, విసి
ఎడ్యుకేషన్ స్టాఫ్ రిపోర్టర్ : ఎస్వీయూ భౌతిక శాస్త్ర విభాగంలో రూసా నిధులతో ఏర్పాటు చేసిన అత్యాధునిక ఎస్ఈఎస్ఈఎ, ఈడీఎస్ పరిశోధనా పరికరాలను రాష్ట్ర ఉన్నత విద్యా మండలి చైర్మన్ ప్రొఫెసర్ విజయభాస్కరరావు, వీసీ ప్రొఫెసర్ టాటా నర్సింగరావుతో కలసి శనివారం ప్రారంభించారు. ఈ సందర్భంగా ఏర్పాటు చేసిన నూతన పరికరాలను వారు పరిశీలించి వివరాలను అడిగి తెలుసుకున్నారు. ఈ ఆధునిక పరిశోధనా పరికరం అందుబాటులోకి రావడంతో విశ్వవిద్యాలయంలో పరిశోధనలకు మరింత ప్రోత్సాహం లభిస్తుందని ప్రొఫెసర్ దేవప్రసాద్ రాజు తెలిపారు. ఈ సందర్భంగా ఆప్సి చైర్మన్ ప్రొఫెసర్ విజయ భాస్కర రావు మట్లాడుతూ ఫీల్డ్ ఎమిషన్ స్కానింగ్ ఎలక్ట్రాన్ మైక్రోస్కోప్ విత్ ఎనర్జీ డిస్పర్సివ్ ఎక్స్రే స్పెక్ట్రోస్కోపీ ద్వారా వివిధ పదార్థాల సూక్ష్మ నిర్మాణం, ఉపరితల స్వరూపం, కణాల పరిమాణం, ఆకృతి, మూలక కూర్పును అత్యంత సూక్ష్మ స్థాయిలో విశ్లేషించవచ్చని తెలిపారు. ఈ పరికరాలను సహాయంతో నమూనాల్లోని వివిధ మూలకాలను గుర్తించడంతోపాటు వాటి కూర్పును విశ్లేషించవచ్చని చెప్పారు. నానో పదార్థాలు, మెటీరియల్స్ సైన్స్, అధునాతన ఫంక్షనల్ మెటీరియల్స్, సెమీకండక్టర్లు, ఫాస్ఫర్లు, ఫోటోకాటలిసిస్, శక్తి సంబంధిత పదార్థాల పరిశోధనలకు ఈ పరికరం ఎంతో ఉపయోగపడుతుందన్నారు. పరిశోధనల్లో కచ్చితత్వం, నాణ్యత, విశ్వసనీయతను పెంపొందించడంతోపాటు అంతర్జాతీయ ప్రమాణాలకు అనుగుణంగా పరిశోధనలు నిర్వహించేందుకు ఇవి దోహదపడతాయని విసి టాటా నరసింగరావు పేర్కొన్నారు. ఈ కార్యక్రమంలో రెక్టార్ ప్రొఫెసర్ చెండ్రాయుడు, రిజిస్ట్రార్ ప్రొఫెసర్ భూపతి నాయుడు, సైన్స్ కళాశాల ప్రిన్సిపల్ ప్రొఫెసర్ పద్మావతి, భౌతిక శాస్త్ర విభాగాధిపతి ప్రొఫెసర్ దేవప్రసాదరాజు పాల్గొన్నారు.
సీఎం గౌడ్ తిరుపతి స్టాఫ్ రిపోర్టర్
