అంతరాష్ట్ర దొంగల ముఠా అరెస్ట్.. రూ.5 లక్షల సొత్తు, రెండు కార్లు స్వాధీనం
పెనమలూరు, మేజర్ న్యూస్ : తాడిగడపలోని కేఎంవీ స్పేసెస్ ఎల్‌ఎల్‌పీ ప్రాంగణంలో అక్టోబర్ 3న జరిగిన రూ.5 లక్షల విలువైన రాగి కేబుళ్ల చోరీ కేసును పెనమలూరు పోలీసులు ఛేదించి అంతరాష్ట్ర దొంగల ముఠాను అరెస్ట్ చేశారు. ప్రాంగణంలో భద్రపరిచిన 77 కాయిళ్ల రాగి వైర్లు అపహరణకు గురైనట్లు ఫిర్యాదు అందడంతో కేసు నమోదు చేసి దర్యాప్తు చేపట్టారు. జిల్లా ఎస్పీ విద్యాసాగర్ నాయుడు ఆదేశాల మేరకు గన్నవరం డీఎస్పీ కే.జయకృష్ణ పర్యవేక్షణలో పెనమలూరు సీఐ ఎన్.వెంకటనారాయణ ఆధ్వర్యంలో పోలీసులు వనకూరు శివారులో ఐదుగురు నిందితులను అదుపులోకి తీసుకున్నారు. మహారాష్ట్రకు చెందిన సతీష్ శంకర్ రహంగ్‌డేల్, దుర్గేష్ చిత్రారేన్ జైస్వాల్, ఆకాష్ కృష్ణ బావనే, నిజాం ఆఫ్తాబ్ అన్సారీ, మధ్యప్రదేశ్‌కు చెందిన ఉమేద్‌లాల్ రామ్‌లాల్ రౌత్‌ను అరెస్ట్ చేసి వారి నుంచి చోరీ సొత్తుతో పాటు నేరానికి ఉపయోగించిన రెండు కార్లను స్వాధీనం చేసుకున్నారు. కేసును త్వరితగతిన ఛేదించిన పోలీసు అధికారులు, సిబ్బందిని ఉన్నతాధికారులు అభినందించారు. నిర్మాణ ప్రదేశాలు, గోదాములు, వాణిజ్య సముదాయాల నిర్వాహకులు రాత్రి వేళల్లో భద్రతను కట్టుదిట్టం చేసుకోవాలని, సీసీ కెమెరాలు, తగిన వెలుతురు, భద్రతా సిబ్బందిని ఏర్పాటు చేసుకోవాలని పోలీసులు సూచించారు. అనుమానాస్పద వ్యక్తులు, వాహనాలు కనిపిస్తే వెంటనే పోలీసులకు లేదా 112కు సమాచారం ఇవ్వాలని కోరారు.
✍️ ప్రేమ్ రాజ్, పెనమలూరు.
