అజయ్ బాబును గెలిపించండి అభివృద్ధి చేసి చూపిస్తా

నేటి దినపత్రిక సూర్య బ్యూరో రాజమహేంద్రవరంఅధికారంలో ఉన్నప్పుడు ఒక్క రూపాయి కూడా రాష్ట్ర ప్రభుత్వ నిధులతో మండపేట ను అభివృద్ధి చేయని ఎమ్మెల్సీ తోట త్రిమూర్తులు ఇప్పుడు మున్సిపల్ ఎన్నికల్లో ఓట్లు ఎలా అడుగుతున్నారో ప్రజలకు సమాధానం చెప్పాలని రాష్ట్ర అంచనాల కమిటీ చైర్మన్, మండపేట ఎమ్మెల్యే వేగుళ్ళ జోగేశ్వరరావు డిమాండ్ చేశారు. మండపేట తెలుగుదేశంపార్టీ కార్యాలయంలో నిర్వహించిన మీడియా సమావేశంలో ఆయన పాల్గొని మాట్లాడారు.  తాను 2000 లో మున్సిపల్ చైర్మన్ గా అధికారం చేపట్టిన తర్వాత అనేక సంస్కరణలకు నాంది పలకడం జరిగిందన్నారు. తొలిసారిగా ఉమ్మడి ఆంధ్రప్రదేశ్ లో ఇంటింటా చెత్త సేకరణ విధానం మండపేట లోనే ప్రారంభించడం జరిగిందన్నారు. అప్పట్లో తాము చేసిన అభివృద్ధిని చూసి ఆ తరువాత అధికారంలోకి వచ్చిన దివంగత ముఖ్యమంత్రి వైఎస్ రాజశేఖరరెడ్డి తమకు అవార్డు ను కూడా అందివ్వడం జరిగిందన్నారు. ఆ తరువాత విమల కుమారి హయాంలోనూ, దివంగత చుండ్రు శ్రీ వర ప్రకాష్ హయాంలోనూ మండపేట మున్సిపాలిటీని అభివృద్ధిలో పరుగులు పెట్టించడం జరిగిందన్నారు. దక్షిణ భారతదేశంలోనే 2వ స్థానం ప్రకాష్ హయాంలో సాధించడం జరిగిందన్నారు. టీడీపీ అధికారం లో ఉన్న కారణంగానే అభివృద్ధిలో మండపేట అగ్ర స్థానంలో నిలిచిందన్నారు. అయితే దురదృష్టవశాత్తూ 2019 లో ప్రజలు వైసీపీ కి అధికారం కట్టబెడితే అభివృద్ధిలో దారుణంగా వెనుకబాటు తనానికి గురైందని పేర్కొన్నారు. ఎమ్మెల్సీ తోట త్రిమూర్తులు ఒక్క రూపాయి కూడా రాష్ట్ర ప్రభుత్వ నిధులతో మున్సిపాలిటీ లో అభివృద్ధి పనులు చేపట్టలేకపోయారని దుయ్యబట్టారు. అధికారంలో ఉన్నప్పుడే ఏమి చేయలేకపోయినా వారు ఇప్పుడెలా ఓట్లు అడుగుతారని ప్రశ్నించారు. అదే విధంగా మున్సిపల్ చైర్మన్ గా పోటీ చేస్తున్న అజయ్ బాబును, 36 వార్డుల కూటమి అభ్యర్థులను సైకిల్, గాజు గ్లాస్, కమలం గుర్తుపై ఓట్లేసి ప్రజలు గెలిపిస్తే అభివృద్ధి అంటే ఎలా ఉంటుందో చేసి చూపిస్తానన్నారు. గడిచిన ఆరు నెలల్లో మండపేట లో ఎలాంటి అభివృద్ధి సాధించామో ప్రజలంతా చూశారన్నారు. ఇకపై పట్టణ సుందరీకరణపై ప్రత్యేక దృష్టి సారిస్తామని చెప్పారు. ప్రజలంతా టీడీపీ కి మరో అవకాశం కల్పించాలని వేగుళ్ళ కోరారు. ఈ సమావేశంలో అమలాపురం పార్లమెంట్ సభ్యుడు గంటి హరీష్ మాధూర్ గారు, రాష్ట్ర నీటి పారుదల అభివృద్ధి సంస్థ చైర్మన్ వేగుళ్ళ లీలాకృష్ణ గారు, నియోజకవర్గ పరిశీలకురాలు తుమ్మల సునీత, జిల్లా గ్రంథాలయ సంస్థ మాజీ చైర్మన్ నల్లమిల్లి వీర్రెడ్డి, అమలాపురం పార్లమెంట్ వాణిజ్య విభాగం అధ్యక్షులు ఉంగరాల రాంబాబు, పట్టణ టీడీపీ అధ్యక్షులు మత్స నాగబాబు, మండపేట మార్కెట్ కమిటీ చైర్మన్ చింతపల్లి రామకృష్ణ, చాపల వీరబాబు, సవరపు సతీష్ తదితరులు పాల్గొన్నారు.