ఆటో డ్రైవర్లకు రోడ్డు భద్రతపై ట్రాఫిక్ పోలీసుల అవగాహన
విజయవాడ, మేజర్ న్యూస్ : రోడ్డు ప్రమాదాల నివారణతో పాటు ప్రయాణికులు, ఇతర వాహనదారుల భద్రతే లక్ష్యంగా ఆటో డ్రైవర్లకు ట్రాఫిక్ పోలీసులు అవగాహన కార్యక్రమం నిర్వహించారు. నగర పోలీస్ కమిషనర్ ఎస్.వి. రాజశేఖర బాబు ఆదేశాలు, డీసీపీ ట్రాఫిక్ షిరీన్ బేగం సూచనల మేరకు శుక్రవారం బెంజ్ సర్కిల్ వద్ద ఆపరేషన్ త్రిశూల్‌లో భాగంగా ఈ కార్యక్రమం చేపట్టారు.
ఈ సందర్భంగా ఐదో ట్రాఫిక్ పోలీస్ స్టేషన్ ఇన్‌స్పెక్టర్ డి.వి. రమణ ఆటో డ్రైవర్లకు పలు సూచనలు చేశారు. విధి నిర్వహణ సమయంలో తప్పనిసరిగా యూనిఫాం ధరించాలని, వాహనం నడిపేటప్పుడు సెల్‌ఫోన్ ఉపయోగించకూడదని, మద్యం సేవించి వాహనాలు నడపరాదని స్పష్టం చేశారు. ట్రాఫిక్, రహదారి భద్రతా నిబంధనలను కచ్చితంగా పాటించాలని సూచించారు.
ఆటోల వెనుక వైపు ఉండే కర్టెన్లను ఎల్లప్పుడూ తెరిచి ఉంచాలని, తద్వారా ఇతర వాహనదారులకు ఆటోలు స్పష్టంగా కనిపించి ప్రమాదాలను నివారించవచ్చని తెలిపారు. ప్రతి ఆటో డ్రైవర్ బాధ్యతాయుతంగా వ్యవహరిస్తూ ప్రయాణికుల భద్రతకు ప్రాధాన్యత ఇవ్వాలని సూచించారు.
ఈ కార్యక్రమంలో ఆటో డ్రైవర్లు, ఐదో ట్రాఫిక్ పోలీస్ స్టేషన్ సిబ్బంది పాల్గొన్నారు.
స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.
