ఆత్మకూరు మున్సిపల్ టిడిపి చైర్మన్ అభ్యర్థిగా డాక్టర్ షకీలా
ఆత్మకూరు, మేజర్ న్యూస్ :
ఆత్మకూరు మున్సిపాలిటీ చైర్ పర్సన్ కూటమి అభ్యర్థిగా ప్రముఖ రాజకీయ కుటుంబమైన బొమ్మిరెడ్డి కుటుంబంలోని డాక్టర్ బొమ్మిరెడ్డి షకీలా ఎంపికయ్యారు. ఈ మేరకు ఆమె అభ్యర్థిత్వాన్ని రాష్ట్ర దేవాదాయ శాఖ మంత్రి ఆనం రామనారాయణరెడ్డి ఆదివారం ప్రకటించడంతోపాటు జన సందోహం మధ్య కోలాహలంగా నిర్వహించిన ర్యాలీతో డాక్టర్ షకీలా మున్సిపల్ కార్యాలయానికి వెళ్లి నామినేషన్ దాఖలు చేశారు. ఆమెతోపాటు ఆమె కోడలు యువ నేత బొమ్మిరెడ్డి తారకనాథరెడ్డి సతీమణి డాక్టర్ గీతికా రెడ్డి కూడా నామినేషన్ దాఖలు చేశారు. డాక్టర్ షకీలా వైద్యురాలుగా సేవలందిస్తూ బిఎస్సార్ హాస్పిటల్ ఎండిగా కొనసాగుతున్నారు. ఆమె దివంగత మాజీ ఎమ్మెల్యే డాక్టర్ బొమ్మిరెడ్డి సుందరరామిరెడ్డి కోడలు కాగా మాజీ మండలాధ్యక్షుడు, మాజీ సర్పంచ్,మాజీ టెలికం జిల్లా సలహా మండలి సభ్యులు దివంగత డాక్టర్ బొమ్మిరెడ్డి రవీంద్రనాథ్ రెడ్డి సతీమణి. యువనేత, బిఎస్ఆర్ ట్రస్ట్ చైర్మన్ గా ట్రస్ట్ ద్వారా అనేక సామాజిక సేవా కార్యక్రమాలు నిర్వహిస్తున్న బొమ్మిరెడ్డి తారకనాథరెడ్డి తల్లి డాక్టర్ షకీలా ఆత్మకూరు మున్సిపాలిటీ అభివృద్ధి ధ్యేయంగా డాక్టర్ షకీలా రాజకీయ రంగ ప్రవేశం చేసి రాష్ట్ర దేవాదాయ శాఖ మంత్రి ఆనం రామనారాయణరెడ్డి ఆశీస్సులతో ఆత్మకూరు మున్సిపల్ చైర్ పర్సన్ అభ్యర్థిగా పోటీలో దిగారు. బొమ్మిరెడ్డి కుటుంబం రాజకీయంగా ప్రాధాన్యత కలిగింది కాగా తారకనాథరెడ్డి అనేక సామాజిక సేవా కార్యక్రమాలు చేయడంతో పాటు డాక్టర్ షకీలా కూడా వైద్య సేవలతో పాటు అనేక సామాజిక సేవా కార్యక్రమాలు నిర్వహిస్తున్నారు.ఆ కుటుంబానికి పట్టణంలో అత్యంత ఆదరణ ఉండడంతో పాటు అభివృద్ధికి మారుపేరైన మంత్రి ఆనం రామనారాయణరెడ్డి బలపరచడం ఆయన నాయకత్వంలో తెలుగుదేశం బిజెపి జనసేన కూటమి తరపున ఆమె పోటీ చేయడం అత్యంత ప్రాధాన్యత సంతరించుకుంది. డాక్టర్ షకీలా విజయం కోసం ఆనం ప్రత్యేక శ్రద్ధతో ప్రత్యేక ప్రచార కార్యక్రమాలు నిర్వహించేలా ప్రణాళికలు రూపొందిస్తున్నారు. ఆమెకు అన్ని వర్గాల నుండి మద్దతు లభించే అవకాశాలు మెండుగా ఉన్నాయని అందరూ భావిస్తున్నారు.
