ఆర్టీసీ ఉద్యోగులకు ఆరోగ్యకరమైన జీవనశైలిపై అవగాహన

విజయవాడ, మేజర్ న్యూస్: ఆర్టీసీ ఉద్యోగుల్లో ఆరోగ్యకరమైన, పర్యావరణహిత జీవనశైలిపై అవగాహన పెంపొందించేందుకు ఆంధ్రప్రదేశ్ రాష్ట్ర రోడ్డు రవాణా సంస్థ ఆధ్వర్యంలో బ్రిక్స్ సుస్థిర జీవనశైలి వారోత్సవాలు ప్రారంభమయ్యాయి. నవంబర్ 1 నుంచి 7వ తేదీ వరకు వారం రోజుల పాటు రాష్ట్రవ్యాప్తంగా 129 డిపోలు, యూనిట్లలో వివిధ అవగాహన కార్యక్రమాలు నిర్వహించనున్నారు. ఈ కార్యక్రమాల్లో భాగంగా మొదటి రోజు ‘ఆరోగ్యకరమైన జీవనశైలిని అలవర్చుకోవడం’ అనే ఇతివృత్తంతో విజయవాడలోని ఆర్టీసీ హౌస్‌లో యోగా కార్యక్రమం నిర్వహించారు. సుమారు 50 మంది అధికారులు, పర్యవేక్షకులు, ఉద్యోగులు ఉత్సాహంగా పాల్గొన్నారు. ప్రముఖ యోగా మాస్టర్లు తులసీ కృష్ణ, మురళీ కృష్ణ ఆధ్వర్యంలో వివిధ యోగాసనాలను ప్రదర్శించారు. యోగా ద్వారా శారీరక దారుఢ్యంతో పాటు మానసిక ప్రశాంతత, ఒత్తిడి నియంత్రణ సాధ్యమవుతాయని వివరించారు. ఉద్యోగులు నిత్య జీవితంలో యోగాను భాగంగా చేసుకోవాలని సూచించారు. ఈ సందర్భంగా విద్యాధరపురంలోని ఏపీఎస్‌ఆర్టీసీ ఆసుపత్రి ముఖ్య వైద్యాధికారి డాక్టర్ శ్రీకాంత రెడ్డి ఉద్యోగులకు ఆరోగ్యంపై అవగాహన కల్పించారు. క్రమబద్ధమైన వ్యాయామం, యోగా, సమతుల్య ఆహారం ద్వారా ఆరోగ్యాన్ని మెరుగుపరచుకోవచ్చని తెలిపారు. ఈ వారోత్సవాల్లో భాగంగా ఆరోగ్యకరమైన జీవనశైలి, ఇంధనం, నీటి సంరక్షణ, సుస్థిర ఆహార విధానాలు, ఒకసారి మాత్రమే వినియోగించే ప్లాస్టిక్‌ వినియోగ నియంత్రణ, ఎలక్ట్రానిక్ వ్యర్థాల తగ్గింపు, వ్యర్థాల నిర్వహణ వంటి అంశాలపై ఏడు రోజుల పాటు ప్రత్యేక అవగాహన కార్యక్రమాలు నిర్వహించనున్నారు. ఇందుకోసం ప్రత్యేక సమన్వయ అధికారిని నియమించి రాష్ట్రస్థాయిలో కార్యక్రమాలను సమన్వయం చేస్తున్నారు. కార్యక్రమం ముగింపులో ఏపీఎస్‌ఆర్టీసీ కార్యనిర్వాహక సంచాలకులు (పరిపాలన) కె.ఎస్. బ్రహ్మానంద రెడ్డి కృతజ్ఞతలు తెలిపారు. యోగా మాస్టర్లు తులసీ కృష్ణ, మురళీ కృష్ణతో పాటు ఆరోగ్య సూచనలు అందించిన డాక్టర్ శ్రీకాంత రెడ్డికి ధన్యవాదాలు తెలిపారు. ఉద్యోగులు యోగా, ఆరోగ్య సూచనలను రోజువారీ జీవితంలో పాటించి ఆరోగ్యకరమైన జీవనశైలిని అలవర్చుకోవాలని కోరారు. ఈ కార్యక్రమాల నిర్వహణను కార్యనిర్వాహక సంచాలకులు (పరిపాలన) కె.ఎస్. బ్రహ్మానంద రెడ్డి పర్యవేక్షిస్తున్నారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.