ఆ ఉపాధ్యాయుడు సస్పెండ్ -హెచ్ఎంకు షోకాజ్ నోటీసు: డీఈఓ
ఎడ్యుకేషన్ స్టాఫ్ రిపోర్టర్ : తిరుపతి జిల్లా రేణిగుంట మండలం, మామండూరు జిల్లా పరిషత్ ఉన్నత పాఠశాలలో 6వ తరగతి విద్యార్థినిపై దాడి చేసిన స్కూల్ అసిస్టెంట్ (ఫిజికల్ సైన్స్) టి.మనోహర్ను సస్పెండ్ చేసినట్లు జిల్లా విద్యాశాఖ అధికారి కెవిఎన్ కుమార్ ఒక ప్రకటనలో తెలిపారు. నోట్బుక్లో రాతపని సకాలంలో పూర్తి చేయలేదనే కారణంతో విద్యార్థినిని కొట్టినట్లు తల్లిదండ్రులు జిల్లా విద్యాశాఖకు ఫిర్యాదు చేశారు. ఈ ఫిర్యాదుపై ప్రాథమిక విచారణ నిర్వహించి, ఉపాధ్యాయుడి ప్రవర్తనపై ప్రాథమికంగా ఆరోపణలు నిర్ధారణ కావడంతో నిబంధనల ప్రకారం క్రమశిక్షణా చర్యలు చేపట్టాలని నిర్ణయించారు. ఈ నేపథ్యంలో మామండూరు జెడ్పీ ఉన్నత పాఠశాలలో పనిచేస్తున్న స్కూల్ అసిస్టెంట్ (ఫిజికల్ సైన్స్) టి.మనోహర్ను విధుల నుంచి సస్పెండ్ చేస్తూ జిల్లా విద్యాశాఖ అధికారి కె.వి.ఎన్. కుమార్ ఉత్తర్వులు జారీ చేశారు. విద్యార్థినిపై జరిగిన ఘటనను ఉన్నతాధికారుల దృష్టికి తీసుకురాకపోవడం, విధి నిర్వహణలో నిర్లక్ష్యం, బాధ్యతల పట్ల అలసత్వం చూపినట్లు పేర్కొంటూ, సంబంధిత ప్రధానోపాధ్యాయుడు మూడు రోజుల్లో వివరణ సమర్పించాలని డీఈఓ ఆదేశించారు. గడువులోగా వివరణ అందించకపోతే, వివరణ లేనట్లుగా పరిగణించి నిబంధనల ప్రకారం తదుపరి క్రమశిక్షణా చర్యలు చేపడతామని ఆయన హెచ్చరించారు.
సీఎం గౌడ్ తిరుపతి స్టాఫ్ రిపోర్టర్