8న తిరుమల శ్రీవారి ఆలయంలో దీపావళి ఆస్థానం, పుష్పయాగం

తిరుమల: శ్రీ వేంకటేశ్వరస్వామి వారి ఆలయంలో త్వరలో జరగనున్న పలు విశేష ఉత్సవాలు, వైకుంఠ ద్వార దర్శనాలకు సంబంధించిన వివరాలను తిరుమల తిరుపతి దేవస్థానం (టీటీడీ) వెల్లడించింది. ఈ నెల 8వ తేదీన స్వామివారి ఆలయంలో దీపావళి ఆస్థానాన్ని పురస్కరించుకుని ఆ రోజు నిర్వహించే అన్ని ఆర్జిత సేవలను రద్దు చేస్తున్నట్లు తెలిపింది.

అలాగే, శ్రీవారి ఆలయంలో ఈ నెల 15వ తేదీన వార్షిక పుష్పయాగానికి అంకురార్పణ జరగనుండగా, 16వ తేదీన సుమారు 7 టన్నుల రంగురంగుల వివిధ రకాల పుష్పాలు, సుగంధ పత్రాలతో స్వామివారికి నేత్రపర్వంగా పుష్పార్చన జరపనున్నారు. ఈ పుష్పయాగం సందర్భంగా 16వ తేదీన కూడా ఆలయంలో ఆర్జిత సేవలను పూర్తి స్థాయిలో రద్దు చేశారు.

మరోవైపు భక్తులు ఎంతగానో ఎదురుచూసే వైకుంఠ ద్వార దర్శనాలను డిసెంబర్ 20వ తేదీ నుండి 29వ తేదీ వరకు మొత్తం 10 రోజుల పాటు కల్పించనున్నట్లు టీటీడీ ప్రకటించింది. ఇందులో మొదటి మూడు రోజులు (డిసెంబర్ 20 నుంచి 22 వరకు) ఈ-డిప్ (E-Dip) విధానం ద్వారా ఎంపిక చేసిన భక్తులకు దర్శన టోకెన్లను కేటాయించనుండగా, మిగిలిన 7 రోజులు సాధారణ భక్తులందరికీ సర్వదర్శనం ద్వారా స్వామివారి వైకుంఠ ద్వార దర్శన భాగ్యం కల్పించనున్నారు.