బోనస్‌ వచ్చింది.. పింఛన్‌ ఏది? - దీపావళి పండుగ వస్తున్నా అందని పింఛన్‌

సూర్య నస్పూర్‌ : సింగరేణి కార్మికులకు బోనస్‌ అందినప్పటికీ, విశ్రాంత కార్మికులకు రావాల్సిన పింఛన్‌ మాత్రం ఇంకా ఖాతాల్లో జమ కాకపోవడంతో వారు తీవ్ర ఆందోళన చెందుతున్నారు. దీపావళి పండుగ సమీపిస్తున్నా పింఛన్‌ అందకపోవడంతో రోజువారీ అవసరాలు తీర్చుకోవడానికి ఇబ్బందులు పడుతున్నారు. ముఖ్యంగా నెలకు రూ.5 వేల నుంచి రూ.10 వేల వరకు పింఛన్‌పై ఆధారపడి జీవిస్తున్న వృద్ధ కార్మికులు ఆర్థిక ఇబ్బందులు ఎదుర్కొంటున్నారు. పింఛన్‌ చెల్లింపుల్లో బ్యాంకుల వారీగా వ్యత్యాసం కనిపిస్తుండటం పెన్షనర్లలో మరింత గందరగోళానికి దారితీస్తోంది. ఎస్బీఐ ఖాతాలు కలిగిన కొంతమంది పెన్షనర్లకు పింఛన్‌ జమ కాగా, ఇతర బ్యాంకుల్లో ఖాతాలున్న వారికి మాత్రం ఇంకా అందలేదని పలువురు పేర్కొంటున్నారు. అదేవిధంగా కొన్ని రీజియన్లలో పింఛన్‌ జమ అయినప్పటికీ, మరికొన్ని రీజియన్లలో పెండింగ్‌లో ఉండటంతో ఈ వ్యత్యాసానికి కారణమేంటని ప్రశ్నిస్తున్నారు. అందరికీ ఒకేసారి పింఛన్‌ చెల్లించాల్సి ఉండగా బ్యాంకులు, రీజియన్ల వారీగా జాప్యం ఎందుకు జరుగుతోందని ఆవేదన వ్యక్తం చేస్తున్నారు. మరోవైపు దీపావళి పండుగను కుటుంబ సభ్యులతో సంతోషంగా జరుపుకోవాల్సిన సమయంలో పింఛన్‌ అందకపోవడంతో చేతిలో డబ్బులు లేక ఇబ్బందులు పడాల్సిన పరిస్థితి ఏర్పడిందని వాపోతున్నారు. ఎన్నో ఏళ్లపాటు సింగరేణి సంస్థలో కష్టపడి పనిచేసి పదవీ విరమణ పొందిన తమకు పండుగ వేళైనా ఆర్థిక ఇబ్బందులు లేకుండా చూడాలని కోరుతున్నారు. సీఎంపీఎఫ్‌ అధికారులు తక్షణమే స్పందించి పింఛన్‌ చెల్లింపుల్లో జాప్యానికి కారణాలను వెల్లడించాలని, పెండింగ్‌లో ఉన్న మొత్తాలను వెంటనే అన్ని బ్యాంకుల ఖాతాల్లో జమ చేయాలని సింగరేణి విశ్రాంత కార్మికులు విజ్ఞప్తి చేస్తున్నారు.
ప్రతి నెల ఒకటో తేదీన రావాల్సిన పింఛన్‌ ఆరో తేదీ వచ్చినా ఖాతాల్లో జమ కాలేదు. దీపావళి పండుగ సమీపిస్తున్న వేళ పింఛన్‌ అందక తీవ్ర ఆర్థిక ఇబ్బందులు ఎదుర్కొంటున్నాం. ఇప్పటికైనా సంబంధిత అధికారులు స్పందించి వెంటనే పింఛన్‌ అందేలా చర్యలు తీసుకోవాలని కోరుతున్నాం. - మర్రి చంద్రయ్య సింగరేణి రిటైర్డ్ ఉద్యోగి  విద్యానగర్,సిసిసి నస్పూర్