ప్రతీ పోలింగ్ కేంద్రంలో సీసీ కెమెరా: జేసి అశుతోష్ శ్రీవాస్తవ
గుంటూరు : పట్టణ, గ్రామ పంచాయతీ ఎన్నికల ప్రతీ పోలింగ్ కేంద్రంలో సీసీ కెమెరాలు ఏర్పాటు చేయుటకు చర్యలు తీసుకోవడం జరిగిందని జాయింట్ కలెక్టర్ అశుతోష్ శ్రీవాస్తవ తెలిపారు. రాజకీయ పార్టీల ప్రతినిధులతో జిల్లా కలెక్టర్ కార్యాలయంలో బుధవారం స్థానిక ఎన్నికలపై సమావేశం జరిగింది. ఈ సమావేశంలో జాయింట్ కలెక్టర్ పాల్గొన్నారు. ఈ సందర్భంగా ఆయన మాట్లాడుతూ ప్రతీ పోలింగ్ కేంద్రంలో సీసీ కెమెరా లేదా కనీసం వీడియోగ్రఫీ ఏర్పాటు చేయడం జరుగుతుందన్నారు. మంగళగిరి తాడేపల్లి నగర పాలక సంస్థ, పొన్నూరు పురపాలక సంఘంలో నామినేషన్ల స్క్రూటీని పూర్తి జరిగిందని, గురువారం ఉపసంహరణలు ఉంటాయన్నారు. ఉపసంహరణలు అనంతరం తుది జాబితా ప్రకటన జరుగుతుందన్నారు. ఈ నెల 26న పోలింగ్, 30న లెక్కింపు జరుగుతుందన్నారు. మంగళగిరి తాడేపల్లి నగర పాలక సంస్థ ఎన్నికలకు ఆచార్య నాగార్జున విశ్వవిద్యాలయంలో పంపిణీ, స్వీకరణ కేంద్రాలు, స్ట్రాంగ్ రూమ్, లెక్కింపు కేంద్రం ఏర్పాటు చేయడం జరిగిందని వివరించారు.పొన్నూరు పురపాలక సంఘం ఎన్నికలకు పొన్నూరులో గల సెయింట్ ఆన్స్ పాఠశాలలో ఏర్పాటు చేయడం జరిగిందని చెప్పారు. జిల్లాలో గ్రామ పంచాయతీ ఎన్నికలు రెండవ, మూడవ దశలలో నిర్వహిస్తు న్నట్లు తెలిపారు. తెనాలి రెవెన్యూ డివిజన్ లో గల చేబ్రోలు, పొన్నూరు, తెనాలి, కొల్లిపర మండలాలు., గుంటూరు రెవెన్యూ డివిజన్ లో గల పెదకాకాని మండలంలో రెండవ విడతలో ఎన్నికలు జరుగుతాయని తెలిపారు. గుంటూరు రెవెన్యూ డివిజన్ లో గల మేడికొండూరు, ఫిరంగిపురం, గుంటూరు, పెదనందిపాడు, ప్రత్తిపాడు, వట్టిచెరుకూరు మండలాలు., తెనాలి రెవెన్యూ డివిజన్ లో గల కాకుమాను, దుగ్గిరాల మండలాల్లో మూడవ విడతలో గ్రామ పంచాయతీ ఎన్నికలు జరుగుతాయని తెలిపారు. రెండవ దశ పోలింగ్ 29న, మూడవ దశ పోలింగ్ డిసెంబరు 2వ తేదీన జరుగుతాయన్నారు. ఎన్నికల ప్రవర్తనా నియమావళి అమలులో భాగంగా అన్ని బృందాలు పనిచేస్తున్నాయని చెప్పారు. ఈ సమావేశంలో జిల్లా రెవిన్యూ అధికారి ఎన్.ఎస్.కె.ఖాజావలి, కాంగ్రెసు పార్టీ ప్రతినిధి కె.కె.గుప్తా, తెలుగుదేశం పార్టీ ప్రతినిధులు కంచర్ల శివరామయ్య, ఆమ్ ఆద్మీ పార్టీ ప్రతినిధి డా.టి.సేవ కుమార్, బహుజన సమాజ్ పార్టీ ప్రతినిధి చిరతన గండ్ల వాసు, సి.పి.ఐ (ఎం) ప్రతినిధి కృష్ణకాంత్, వైఎస్ఆర్సిపి ప్రతినిధి వై పిచ్చి రెడ్డి, జన సేన పార్టీ ప్రతినిధి త్రినాథ్, తదితరులు పాల్గొన్నారు.
సూర్య నాయక్