వర్సిటీల కేంద్రంగా సమగ్ర క్రీడా వ్యవస్థ ఏర్పాటుకు మన్సుఖ్ మాండవ్య పిలుపు
సూర్య నేషనల్ డెస్క్: దేశంలో క్రీడా ప్రమాదాలను మరింత మెరుగుపరచడంతో పాటు క్రీడా విద్యా వ్యవస్థను బలోపేతం చేసే లక్ష్యంతో కేంద్ర ప్రభుత్వం కీలక చర్యలకు శ్రీకారం చుట్టింది. దేశవ్యాప్తంగా ఉన్న క్రీడా విశ్వవిద్యాలయాలను అనుసంధానిస్తూ ఒక సమగ్ర జాతీయ క్రీడా వ్యవస్థను (Integrated National Sports Ecosystem) ఏర్పాటు చేయాలని కేంద్ర యువజన వ్యవహారాలు మరియు క్రీడాశాఖ మంత్రి డాక్టర్ మన్సుఖ్ మాండవ్య పిలుపునిచ్చారు. కొత్తఢిల్లీలో దేశంలోని వివిధ ప్రాంతాలకు చెందిన 13 క్రీడా విశ్వవిద్యాలయాల ఉపకులపతులు (VCs) మరియు ప్రతినిధులతో నిర్వహించిన ఉన్నత స్థాయి సమావేశంలో ఆయన ఈ ప్రణాళికను ఆవిష్కరించారు.
ఇకపై క్రీడా వర్సిటీలు వేర్వేరుగా (Silos) పని చేయడం మానుకోవాలని మన్సుఖ్ మాండవ్య స్పష్టం చేశారు. వర్సిటీల మధ్య పరస్పర సహకారం, కోచ్లు మరియు విజ్ఞాన మార్పిడి (Knowledge Exchange), వనరుల పంచుకోవడం వంటి అంశాలకు అత్యంత ప్రాధాన్యత ఇవ్వాలని సూచించారు. కేవలం అథ్లెట్లను తయారు చేయడంపైనే కాకుండా, క్రీడా విజ్ఞానశాస్త్రం (Sports Science), స్పోర్ట్స్ లా (Sports Law), స్పోర్ట్స్ టూరిజం (Sports Tourism) వంటి ఉద్భవిస్తున్న రంగాలలో ప్రత్యేక నైపుణ్యాన్ని పెంపొందించుకోవాలని ఆయన కోరారు. దీనివల్ల దేశంలో క్రీడా నిర్వహణ, అడ్మినిస్ట్రేషన్ మరియు పరిశ్రమకు అవసరమైన నిపుణులు తయారవుతారని పేర్కొన్నారు.
భారతీయ క్రీడా విశ్వవిద్యాలయాలను ప్రపంచ స్థాయికి తీసుకెళ్లడమే ప్రభుత్వ ప్రధాన లక్ష్యమని మంత్రి వెల్లడించారు. అథ్లెట్లు, కోచ్లు, శిక్షణ, పరిశోధనలు మరియు ప్రపంచ స్థాయి మౌలిక వసతులు అన్నీ ఒకే వేదికపైకి వచ్చేలా క్రీడా వర్సిటీలను ప్రధాన కేంద్రాలుగా మలచాలని పిలుపునిచ్చారు. ఈ సమావేశంలో కేంద్ర క్రీడాశాఖ రాష్ట్ర మంత్రి రక్షా ఖడ్సే, క్రీడాశాఖ కార్యదర్శి హరి రంజన్ రావుతో పాటు పలు వర్సిటీల వీసీలు పాల్గొన్నారు.