యాసంగిలో ‘నీటి లభ్యత’ ఆధారంగానే రైతులు పంటల సాగు చేపట్టాలి : ఏఓ సుదర్శన్ గౌడ్

కృష్ణ సూర్య న్యూస్ :
రాబోయే యాసంగి సీజన్‌లో నీటి లభ్యతను దృష్టిలో ఉంచుకొని, దానికి అనుగుణంగానే రైతన్నలు పంటల సాగు చేపట్టాలని మండల వ్యవసాయ అధికారి  సుదర్శన్ గౌడ్  పేర్కొన్నారు. ఖేత్ బచావో అభియాన్’ (సాగు భూమి సంరక్షణ) కార్యక్రమంలో భాగంగా గురువారం మండలంలోని చేగుంట రైతు వేదికలో సాగు భూముల సంరక్షణ, నేల ఆరోగ్య పరిరక్షణ మరియు పంటల మార్పిడి అంశాలపై రైతులకు విస్తృత అవగాహన కార్యక్రమం నిర్వహించారు.
ఈ సందర్భంగా వ్యవసాయ అధికారి మాట్లాడుతూ.. రాబోయే యాసంగి కాలంలో ఎల్ నినో ప్రభావం కారణంగా వర్షపాతం, నీటి లభ్యతలో హెచ్చుతగ్గులు వచ్చే అవకాశం ఉందన్నారు. కాబట్టి రైతులు ముందస్తు జాగ్రత్తలు పాటిస్తూ, భూగర్భ జలాల లభ్యత మరియు విద్యుత్ వినియోగాన్ని అంచనా వేసుకొని పంటల ఎంపికపై నిర్ణయం తీసుకోవాలని సూచించారు. ముఖ్యంగా యాసంగిలో ఎక్కువ నీరు అవసరమయ్యే వరి సాగును సాధ్యమైనంత వరకు తగ్గించాలని సూచించారు. తక్కువ నీటితో పండే శనగ, పెసర, మినుము వంటి పప్పుధాన్య పంటలకు మొదటి ప్రాధాన్యత ఇవ్వాలన్నారు. పంటల మార్పిడి వల్ల నేల సారం పెరగడమే కాకుండా నీటి వనరులను సమర్థవంతంగా వాడుకోవచ్చని వివరించారు. 
దీంతో తక్కువ నీటితో తక్కువ కాలంలో అధిక దిగుబడులు  రైతులు సాధించవచ్చన్నారు. 
అదేవిధంగా నేల ఆరోగ్యాన్ని కాపాడుకోవడానికి సేంద్రియ పదార్థాల వినియోగాన్ని పెంచాలని, పంట వ్యర్థాలను నేలలోనే కలిపి దున్నాలని సూచించారు. భూసార పరీక్షల ఆధారంగానే తగిన ప్రమాణాల్లో ఎరువులను వాడాలని  ఆయన స్పష్టం చేశారు. స్థానిక వాతావరణం, నేల స్వభావం, నీటి వసతికి తగినట్లుగా రైతులు పంటల్లో వైవిధ్యీకరణ పాటించి సాగు ఖర్చు తగ్గించుకోవాలన్నారు.
కాబట్టి స్థిరమైన వ్యవసాయ పద్ధతుల ద్వారా రైతన్నలు ఆశించిన దిగుబడులు సాధించాలని మండల వ్యవసాయ అధికారి సుదర్శన్ గౌడ్ కోరారు.
ఈ అవగాహన కార్యక్రమంలో వ్యవసాయ విస్తరణ అధికారి (ఏఈఓ) సునీల్‌తో పాటు గ్రామ పెద్దలు, పెద్ద సంఖ్యలో స్థానిక రైతులు పాల్గొన్నారు.

నర్సిములు, సూర్య రిపోర్టర్ కృష్ణ మండలం