సూర్య, ఆదిలాబాద్‌ : తెలంగాణ చరిత్రలో ప్రజావీరుడు పండుగ సాయన్నకు ప్రత్యేక స్థానం ఉందని, ఆయన జీవితం సమానత్వం, ధైర్యసాహసాలకు ప్రతీకగా నిలుస్తుందని అదనపు ఎస్పీ పి. మౌనిక అన్నారు. గురువారం జిల్లా పోలీసు కార్యాలయంలో పండుగ సాయన్న జయంతి వేడుకల్లో పాల్గొని, ఆయన చిత్రపటానికి పూలమాల వేసి నివాళులర్పించారు.
ఈ సందర్భంగా ఆమె మాట్లాడుతూ.. పేదలు, బడుగు బలహీన వర్గాల హక్కుల కోసం పోరాడిన పండుగ సాయన్న ప్రజల హృదయాల్లో చిరస్థాయిగా నిలిచిపోయారని పేర్కొన్నారు. అన్యాయాన్ని ఎదిరించడం, ఆత్మగౌరవంతో జీవించడం, అణగారిన వర్గాలకు అండగా నిలవడం ఆయన జీవితంలోని ముఖ్యమైన విలువలన్నారు. సమాజంలో అసమానతలు తొలగి అందరికీ సమాన అవకాశాలు, గౌరవం లభించినప్పుడే నిజమైన అభివృద్ధి సాధ్యమవుతుందని తెలిపారు.ప్రజల కోసం పోరాడిన మహనీయుల చరిత్రను భావితరాలకు తెలియజేయాలని, వారి ఆశయాలను స్ఫూర్తిగా తీసుకుని యువత సామాజిక బాధ్యతతో ముందుకు సాగాలని సూచించారు. సమాజంలో శాంతి, సామరస్యం, పరస్పర గౌరవం పెంపొందించేందుకు ప్రతి ఒక్కరూ కృషి చేయాలని పిలుపునిచ్చారు.కార్యక్రమంలో ఏఆర్‌ డీఎస్పీ కమతం ఇంద్రవర్ధన్‌, రిజర్వ్‌ ఇన్‌స్పెక్టర్‌ డి. వెంకటి, సీఐ నైలు, పోలీసు కార్యాలయ సూపరింటెండెంట్‌ సులోచన, ఇతర పోలీసు అధికారులు, సిబ్బంది పాల్గొన్నారు.
