telangana
ముదిరాజ్‌లను బీసీ-ఏలో చేర్చే అంశంపై కేబినెట్ సబ్‌కమిటీ అధ్యయనం
హైదరాబాద్‌: ముదిరాజ్ సామాజిక వర్గాన్ని బీసీ-డీ నుంచి బీసీ-ఏ గ్రూప్‌లోకి మార్చే అంశంపై మంత్రివర్గ ఉపసంఘం (కేబినెట్ సబ్‌కమిటీ) సమగ్రంగా అధ్యయనం చేయనుందని ముఖ్యమంత్రి ఎ. రేవంత్ రెడ్డి ప్రకటించారు. హైదరాబాద్‌లోని రవీంద్రభారతిలో ప్రభుత్వం అధికారికంగా నిర్వహించిన 'పండుగ సాయన్న ముదిరాజ్ 174వ జయంతి' వేడుకల్లో ఆయన ముఖ్య అతితిగా పాల్గొని పండుగ సాయన్న చిత్రపటానికి నివాళులర్పించారు.
ఈ సందర్భంగా సీఎం మాట్లాడుతూ.. గతంలో ముదిరాజ్ కమ్యూనిటీని బీసీ-ఏ లోకి మార్చేందుకు సరైన లెక్కలు లేవన్న కారణంతో కోర్టులు తిరస్కరించాయని, అయితే ప్రభుత్వం నిర్వహించిన పక్కా కులగణన ఆధారంగా భవిష్యత్తులో ఎలాంటి న్యాయపరమైన చిక్కులు రాకుండా కేబినెట్ సబ్‌కమిటీ అధ్యయనం చేస్తుందని తెలిపారు. న్యాయనిపుణులు, అధికారులతో చర్చించిన మీదట ముదిరాజ్‌లకు న్యాయం జరిగేలా నిర్ణయం తీసుకుంటామన్నారు. అలాగే ముదిరాజ్‌లను బీసీ-ఏ లో చేర్చడం వల్ల గంగపుత్రులకు అన్యాయం జరుగుతుందన్న అపోహలను తొలగించేందుకు ఆయా వర్గాలతో చర్చించాలని మంత్రి పొన్నం ప్రభాకర్‌ను ఆదేశించారు.
నిరుపేదల కోసం పోరాడిన యోధులు పండుగ సాయన్న, దొడ్డి కొమురయ్యల విగ్రహాలను ట్యాంక్ బండ్ పరిసరాల్లో ప్రతిష్టిస్తామని వెల్లడించారు. ప్రభుత్వం చేపట్టిన కులగణన దేశానికే ఆదర్శంగా నిలిచిందని, బలహీన వర్గాలకు సామాజిక న్యాయం అందించడమే తమ ప్రభుత్వ ప్రధాన ధ్యేయమని స్పష్టం చేశారు. ఈ కార్యక్రమంలో మంత్రులు పొన్నం ప్రభాకర్, వాకిటి శ్రీహరి, ఎంపీలు ఈటల రాజేందర్, అనిల్ కుమార్ యాదవ్ తదితర ప్రజాప్రతినిధులు పాల్గొన్నారు.
