వి.బి.జి. రామ్ జీ పనులపై విధివిధానాలు పాటించాలి – ఎంపీడీవో రమేష్
సూర్య, భీమిని: వి.బి.జి. రామ్ జీ పథకం పనుల నిర్వహణలో నిర్దేశించిన విధివిధానాలను తప్పనిసరిగా పాటించాలని ఎంపీడీవో రమేష్ సూచించారు. మంగళవారం భీమిని మండల పరిషత్ కార్యాలయంలో ఈ పథకానికి సంబంధించి నిర్వహించిన మొదటి విడత ఓరియంటేషన్ కార్యక్రమంలో ఆయన మాట్లాడారు.
ఈ సందర్భంగా పథకానికి సంబంధించిన విధివిధానాలు, అమలు తీరు, మేట్ల బాధ్యతలు, క్షేత్రస్థాయిలో నిర్వహించాల్సిన విధులు, పనుల నిర్వహణలో పాటించాల్సిన నియమ నిబంధనలపై మేట్లకు అవగాహన కల్పించారు. కూలీల హాజరు నమోదు, పని ప్రదేశంలో కూలీల వివరాల నిర్వహణ, రోజువారీ పనుల పర్యవేక్షణ, పనుల కొలతల నమోదు, పారదర్శకత వంటి కీలక అంశాలను వివరించారు. అలాగే పథకం అమలులో ప్రతి ఒక్కరూ తమకు కేటాయించిన బాధ్యతలను సమర్థవంతంగా నిర్వహించాలని, ప్రభుత్వ నిబంధనలకు అనుగుణంగా పనులు చేపట్టాలని సూచించారు. ఈ కార్యక్రమంలో ఏపీవో సత్యప్రసాద్, ఈసీ రాజేంద్రప్రసాద్, టీఏ వేణు భార్గవ్, శ్యామ్ గల్ తదితరులు పాల్గొని మేట్లకు విధులు, బాధ్యతలు, కొలతల నిర్వహణపై తగిన సూచనలు, సలహాలు అందించారు.
