వైభవంగా లింగ దీక్ష మహోత్సవాలు

జహీరాబాద;జహీరాబాద్‌ పట్టణంలోని సిద్దేశ్వరాలయంలో జంగమ సమాజం ఆధ్వర్యంలో నిర్వహిస్తున్న లింగ దీక్ష మహోత్సవాలు వైభవంగా కొనసాగుతున్నాయి. ఉత్సవాల్లో భాగంగా శనివారం ఉదయం స్వామివారికి అభిషేకం, ప్రత్యేక పూజలు నిర్వహించారు. అనంతరం వేద మంత్రోచ్ఛరణల నడుమ ఆరుద్రోత్సవాలు, పూర్ణాహుతి కార్యక్రమాలను భక్తిశ్రద్ధలతో జరిపారు. ఈ సందర్భంగా స్థానిక సీనియర్‌ సివిల్‌ జడ్జి కవితా దేవి, బార్‌ అసోసియేషన్‌ అధ్యక్షుడు శ్రీనివాస్‌ రెడ్డి, మున్సిపల్‌ వైస్‌ చైర్మన్‌ శిరీష సురేందర్‌ రెడ్డి పాల్గొని స్వామివారికి ప్రత్యేక పూజలు నిర్వహించారు. ఆలయానికి విచ్చేసిన భక్తులు స్వామివారిని దర్శించుకుని మొక్కులు చెల్లించుకున్నారు.ఆలయ ఈవో శివ రుద్రప్ప, ఉత్సవ కమిటీ సభ్యులు, జంగమ సమాజం ప్రతినిధులు, మహిళలు, భక్తులు కార్యక్రమంలో పాల్గొన్నారు.లింగ దీక్ష మహోత్సవాల్లో భాగంగా ఆదివారం ఉజ్జయిని జగద్గురువుల ఆధ్వర్యంలో లక్ష పుష్పార్చన, రుద్రాభిషేకం తదితర ప్రత్యేక పూజా కార్యక్రమాలు నిర్వహించనున్నట్లు ఉత్సవ కమిటీ సభ్యులు తెలిపారు. ఈ కార్యక్రమాలకు భక్తులు పెద్ద సంఖ్యలో హాజరై జగద్గురువుల ఆశీస్సులు పొందాలని వారు కోరారు.