వారం రోజులుగా మరమ్మతులు ఏవీ??
జిన్నారం :జిన్నారం మున్సిపాలిటీ పరిధిలోని 18వ వార్డు నర్రిగూడెంలో తాగునీటి పైప్‌లైన్‌ లీకేజీ సమస్య కాలనీవాసులను ఆందోళనకు గురిచేస్తోంది. పైప్‌లైన్‌ మరమ్మతుల కోసం వారం రోజుల క్రితం తవ్విన గుంతను అలాగే వదిలేయడంతో ప్రమాదం పొంచి ఉందని స్థానికులు వాపోతున్నారు. మరోవైపు పైప్‌లైన్‌ నుంచి నీరు వృథాగా పోతున్నా సంబంధిత అధికారులు పట్టించుకోవడం లేదని ఆవేదన వ్యక్తం చేస్తున్నారు. పైప్‌లైన్‌ లీకేజీని అరికట్టేందుకు గుంత తవ్వినప్పటికీ, వారం రోజులు గడుస్తున్నా మరమ్మతులు పూర్తి చేయకపోవడంపై కాలనీవాసులు అసహనం వ్యక్తం చేస్తున్నారు. గుంత కారణంగా ప్రమాదాలు జరిగే అవకాశం ఉందని, ముఖ్యంగా రాకపోకలు సాగించే ప్రజలు ఇబ్బందులు ఎదుర్కొనే పరిస్థితి నెలకొందని స్థానిక ప్రజలు పేర్కొంటున్నారు. ఇప్పటికే విద్యుత్‌ కోతలతో ఇబ్బందులు పడుతున్న ప్రజలకు, మరోవైపు నీటి వృథా కారణంగా భవిష్యత్తులో నీటి ఎద్దడి తలెత్తే ప్రమాదం ఉందని ఆందోళన చెందుతున్నారు.ఇప్పటికైనా అధికారులు స్పందించాలి
ప్రజలకు ఇబ్బందులు కలగకుండా తక్షణమే పైప్‌లైన్‌ లీకేజీని అరికట్టి, మరమ్మతులు పూర్తి చేయాలని కాలనీవాసులు కోరుతున్నారు. ప్రమాదకరంగా ఉన్న గుంతను పూడ్చివేసి, నీటి వృథాను అరికట్టేలా మున్సిపల్‌ అధికారులు వెంటనే చర్యలు తీసుకోవాలని స్థానికులు విజ్ఞప్తి చేస్తున్నారు.
