తిమ్మాపూర్‌ను వెంటనే కరువు మండలంగా ప్రకటించాలి
సూర్య తిమ్మాపూర్: పంటలు ఎండిపోయి, తీవ్ర నీటి ఎద్దడితో అల్లాడుతున్న తిమ్మాపూర్ మండలాన్ని వెంటనే కరువు మండలంగా ప్రకటించి రైతులను ఆదుకోవాలని బీజేపీ రాష్ట్ర కార్యవర్గ సభ్యుడు ఇనుకొండ నాగేశ్వర్ రెడ్డి డిమాండ్ చేశారు. మండల బీజేపీ అధ్యక్షుడు చింతం శ్రీనివాస్ ఆధ్వర్యంలో గురువారం హైదరాబాద్‌–రాజీవ్‌ రహదారిపై తహసీల్దార్ కార్యాలయం ఎదుట రాస్తారోకో నిర్వహించారు. ఈ సందర్భంగా రాష్ట్ర ప్రభుత్వానికి, ఎమ్మెల్యే కవ్వంపల్లి సత్యనారాయణకు వ్యతిరేకంగా నినాదాలు చేశారు. అనంతరం తహసీల్దార్‌కు వినతిపత్రం అందజేశారు.నాగేశ్వర్ రెడ్డి మాట్లాడుతూ కరువు పరిస్థితులతో రైతులు సాగుకు దూరమవుతున్నా తిమ్మాపూర్‌ను కరువు మండలాల జాబితాలో చేర్చకపోవడం అన్యాయమన్నారు. అధికారులు క్షేత్రస్థాయిలో పర్యటించి వాస్తవ పరిస్థితులను పరిశీలించాలని కోరారు. ఎండిపోయిన పంటలకు నష్టపరిహారం చెల్లించి, ప్రత్యామ్నాయ సాగునీటి సౌకర్యాలు కల్పించాలని డిమాండ్ చేశారు. ప్రభుత్వం, ప్రజాప్రతినిధులు వెంటనే స్పందించకపోతే బీజేపీ ఆధ్వర్యంలో పెద్ద ఎత్తున ఆందోళనలు చేపడతామని హెచ్చరించారు.
