టపాసులు పేల్చేటప్పుడు ఇతరులకు ఇబ్బంది కలిగించవద్దు

సీఐ వెంకటేశ్వర్లు 

ఆమనగల్లు రంగారెడ్డి:

దీపావళి పండుగ పర్వదినాన్ని పురస్కరించుకొని ప్రజలు టపాసులు పేల్చే సమయంలో ఇతరులకు ఇబ్బందులు కలగకుండా తగు జాగ్రత్తలు తీసుకోవాలని సిఐ సంద వెంకటేశ్వర్లు చెప్పారు. శనివారం ఆయన మాట్లాడుతూ టపాసులు విక్రయించే వ్యాపారులు తమ దుకాణాలకు తప్పనిసరిగా పోలీసుల అనుమతి తీసుకొని, దుకాణంలో పెద్ద మొత్తంలో స్టాక్ నిలువలు ఉంచొద్దని ఆయన పేర్కొన్నారు. గృహాల మధ్య భారీ శబ్దాలనిచ్చే టపాసులను కాల్చి ఇతరులకు ఎలాంటి ఇబ్బంది కలిగించవద్దని ఆయన వివరించారు. ప్రధాన రహదారులపై ప్రజలు ఇష్టానుసారంగా టపాసులు కాల్చి వాహనదారులు, పాదాచారులకు ఇబ్బందులు కలిగిస్తే చర్యలు తప్పవని ఆయన హెచ్చరించారు. దీపావళి పండుగ ప్రతి ఒక్కరి జీవితాల్లో వెలుగులు నింపాలని ఆయన ఆకాంక్షించారు. 

ఎ. చంద్రశేఖర్, మేజర్ న్యూస్.