శ్రీ సిద్ధి టోంకిని హనుమాన్ 25వ మహా పాదయాత్రకు అంగరంగ వైభవంగా ఏర్పాట్లు
సూర్య సిర్పూర్ (టి) :భక్తుల కొంగు బంగారంగా విరాజిల్లుతున్న శ్రీ సిద్ధి టోంకిని హనుమాన్ స్వామివారి 25వ మహా పాదయాత్ర ఈ నెల 17వ తేదీ మంగళవారం నాడు అత్యంత వైభవంగా జరగనుంది.ఈ సందర్భంగా స్వామివారి ఆలయాన్ని బంతి పూలు, మామిడి తోరణాలతో సుందరంగా అలంకరించారు. ఆలయం మొత్తం విద్యుత్ దీపాలతో దేదీప్యమానంగా వెలిగిపోతుంది. స్వామివారి దర్శనం కోసం భక్తులు పెద్ద ఎత్తున తరలివస్తున్నారు.25 సంవత్సరా లుగా నిర్విరామంగా కొనసాగుతున్న ఈ పాదయాత్రలో పాల్గొనడం తమ జన్మ ధన్యమని భక్తులు చెబుతున్నారు. హనుమాన్ నామస్మరణతో, భజనలతో, కోలాటాలతో పాదయాత్ర మార్గం మొత్తం భక్తి పారవశ్యంతో నిండిపోనుంది. పాదయాత్రకు విచ్చేసే భక్తులకు ఎలాంటి ఇబ్బందులు కలగకుండా ఆలయ కమిటీ సభ్యులు లోయ,మారుతి, పవన్, అన్ని ఏర్పాట్లు చేశారు. వివిధ రాజకీయ పార్టీలు, స్వచ్ఛంద సంస్థలు,భక్తులు పాదయాత్ర కు వచ్చి భక్తులకు తాగునీరు, అన్నదానం, వైద్య సదుపాయాలు ఏర్పాటు చేశారు.స్వామివారిని దర్శించుకున్న భక్తులకు సకల కోరికలు నెరవేరుతాయని, కష్టాలు తొలగిపోతాయని భక్తులు విశ్వాసం వ్యక్తం చేస్తున్నారు. జై హనుమాన్ నినాదాలతో సిర్పూర్ (టి) ప్రాంతమంతా మారుమోగనుంది.జిల్లా పోలీసు శాఖ తో పాటు కౌటల సిఐ ,సిర్పూర్ పోలీస్ అధికారులు ప్రత్యేక ఏర్పాట్లు చేశారు.